Sý tasqyny: BQO dárigerleri Astanaǵa barýy tıis júkti kelinshekti bosandyryp aldy
ORAL. KAZINFORM — Batysqazaqstandyq dárigerler Astana qalasyndaǵy respýblıkalyq tórtinshi deńgeıdegi «Ana men bala» ortalyǵyna joldanǵan júkti kelinshekti Bórli aýdandyq ortalyq aýrýhanasynda aman-esen bosandyryp aldy.
Atalmysh aýrýhana dırektory Altynaı Baımuratovanyń málim etkenindeı, Aqsaı qalasynyń turǵyny Marııam Dúzbatyrova alǵash ret ekiqabat bolyp, júktiliktiń 9 aptasynda esepke turǵan.
Altynaı Keńesbaıqyzynyń sózine qaraǵanda, bastapqy tekserý qorytyndylarynyń barlyǵy qalypty bolǵan.
«Alaıda júktiliktiń 30-aptasynda elektr kardıogramma tekserisi nátıjesinde júrek yrǵaǵynyń buzylýy anyqtalyp, oblystyq kardıologııalyq ortalyqqa joldandy. Kelinshek 28 aqpan men 12 naýryz aralyǵynda atalǵan ortalyqta em qabyldap, oblystyq jáne respýblıkalyq deńgeıde mamandarmen konsılıým qurylyp, arıtmologtan keńes alynǵan. Konsılıýmmen Marııamnyń Astana qalasyndaǵy «Ana men bala» ortalyǵynda bosanýy kerektigi týraly sheshim qabyldanǵan» deıdi aýrýhana dırektory.
Dárigerdiń aıtýynsha, júkti áıel jolǵa daıyndalyp júrgen sátte, 2 sáýir kúni tańǵy saǵat 05.00-de júktiliktiń 35 apta 6 kúninde erte qaǵanaq sýynyń ketýine baılanysty aýdandyq aýrýhananyń bosaný bólimine túsken.
Dál osy kezde tasqynǵa baılanysty Oral-Aqsaı arasyndaǵy avtojoldyń bir bóligin sý shaıyp ketken edi.
«Marııamdy oblystyq perınataldyq ortalyqqa jetkizý múmkindigi bolmaǵandyqtan, jedel túrde oblystyq shtattan tys mamandarmen uıaly telefon arqyly konsılıým quryldy. Sanavıatsııa mamandaryn ózimizge shaqyrttyq. Júkti áıeldiń ózi jeńildengen jaǵdaıda onyń ómirine qaýip tóný múmkindigi eskerilip, ota, ıaǵnı kesar tiligimen bosandyryp alý týraly shuǵyl sheshim qabyldandy. Osylaısha, aýdandyq jáne oblystyq sanavıatsııa mamandarymen birge komandalyq jumys atqarylyp, nátıjesinde eshqandaı asqynýsyz salmaǵy 3 316 gramm ul bala dúnıege keldi. Qazirgi tańda ana men sábıdiń densaýlyǵy birqalypty. Olardyń jaǵdaıy aýdandyq jáne oblystyq dáriger mamandarmen tolyq baqylaýda. Jýyrda úıine shyǵarý josparlanyp otyr» dedi A.Baımuratova.
Bosaný protsesine oblystyq densaýlyq saqtaý basqarmasy basshysynyń orynbasary Gúlnár Ábdirahmanova basshylyq etti.
Júkti kelinshek pen shaqalaqtyń ómirin aman alyp qalýǵa aýdandyq aýrýhana dırektorymen birge sanavıatsııa dárigerleri, dáriger-anestezıolog Ázız Eshmuhan, kardıoreanımatolog Aıdar Myrzaǵalıev, akýsher-gınekolog Tımýr Muhametııarov atsalysty.
BQO densaýlyq saqtaý basqarmasy baspasóz qyzmetiniń naqtylaýynsha, júkti kelinshek pen shaqalaqtyń ómirin aman alyp qalýǵa aýdandyq aýrýhana dırektorymen birge sanavıatsııa dárigerleri, dáriger-anestezıolog Ázız Eshmuhan, kardıoreanımatolog Aıdar Myrzaǵalıev, akýsher-gınekolog Tımýr Muhametııarov atsalysty. Sondaı-aq aýdandyq aýrýhana dırektorynyń ana men balany qorǵaý jónindegi orynbasary Indıra Esenturlıeva, reanımatolog-anestezıolog Larısa Ismaǵulova, bosaný bólimshesiniń meńgerýshisi Nursaıa Sýtalıeva, gınekologııa bóliminiń meńgerýshisi Bekzat Maqsymov, neanatolog Ásem Qarabekova súbeli úles qosty.
