Sý tasqyny: BQO-da jaǵdaıdyń turaqtalýyna baılanysty 100 atys qarýy ıelerine qaıtaryldy
ORAL. KAZINFORM – Batys Qazaqstan oblysynda sý tasqyny bastalǵannan beri 441 adamnan 631 atys qarýy polıtsııa departamentine saqtaýǵa alyndy.
BQO polıtsııa departamenti bastyǵynyń birinshi orynbasary, polıtsııa polkovnıgi Janbolat Janshınniń óńirlik kommýnıkatsııalar qyzmeti alańynda ótken brıfıngte málim etkenindeı, sonyń ishinde Oralda – 38, Aqjaıyq aýdanynda – 166, Bórlide – 162, Báıterekte – 90, Jańaqalada – 88, Qaratóbede – 4, Syrymda – 27, Terektide 56 qarý alyndy.
Janbolat Jasqaıratulynyń sózine qaraǵanda, jedel jaǵdaıdyń turaqtalýyna baılanysty 100 atys qarýy ıelerine qaıtaryldy.
Batys Qazaqstan oblysy ákiminiń sheshimi negizinde 2024 jylǵy 1 sáýirden bastap tabıǵı sıpattaǵy tótenshe jaǵdaıdyń engizilýine baılanysty polıtsııa departamentiniń jeke quramy kúsheıtilgen túrde qyzmet atqarýǵa kóshirilgen bolatyn.
J.Janshınniń aıtýynsha, sý tasqyny bastalǵannan beri qoǵamdyq tártipti saqtaý, jol qaýipsizdigin qamtamasyz etý, halyqty sý basqan aımaqtardan evakýatsııalaý, zardap shekken azamattarǵa kómek kórsetý jáne basqa mindetterdi oryndaýǵa 1 535 polıtsııa men Ulttyq ulan qymetkerleri, 152 tehnıka jumyldyryldy. Sonyń ishinde Ulttyq ulannyń 500 sarbazy Shymkent, Qyzylorda qalalarynan kelip, jaǵdaıdyń qalypqa kelýine óz úlesterin qosty. Uıymdastyrýshylyq máselelerdi jedel sheshý jáne basshylyqty júzege asyrý úshin polıtsııa departamentinde jedel shtab quryldy.
«Qazirgi ýaqytta polıtsııa men Ulttyq ulan qyzmetkerleri saıajaılarda urlyqty boldyrmaý úshin táýlik boıy qyzmet etýde. Olar jaıaý júrýmen birge qajet kezde qaıyqpen, kvadrotsıkldarmen de shyǵady. Sonyń nátıjesinde tonaý jáne maroderlik faktilerine jol berilgen joq. Oblysta múddeli organdarmen birlese otyryp, sý tasqyny zardaptaryn joıý jumystary jalǵasýda», dedi J.Janshın.
Eske sala keteıik, budan buryn BQO-da mal shyǵyny boıynsha ótemaqy qalaı berilip jatqanyn jazǵan bolatynbyz.
BQO-da sý tasqynynan japa shekken 1 690 adamǵa 612 mln teńge materıaldyq kómek kórsetildi.
