Sý tasqyny aımaqtarynda oqýshylar aralyq baqylaý tapsyrmaıdy
ASTANA. KAZINFORM – Oqý-aǵartý vıtse-mınıstri Edil Ospan sý tasqynynan zardap shekken, TJ jarııalanǵan eldi mekenderdegi pedagogtar men balalarǵa jasalatyn jeńildikter týraly aıtyp berdi.
Onyń aıtýynsha, 7 myńnan astam balalar men olardyń ata-analary jaıly oryndarǵa kóshirildi.
«Atyraý, Aqtóbe oblystarynda barlyq bilim alýshylar, Aqmola, Soltústik Qazaqstan oblystarynda – TJ jarııalanǵan eldi mekenderde mektepterde aǵymdaǵy jáne aralyq baqylaý toqtatyldy. ıAǵnı toqsandyq baǵa qorytyndy baǵa retinde shyǵarylady», - dedi mınıstrlik ókili 10 respýblıkalyq arnada ótip jatqan telemarafonda.
Aqtóbe, Aqmola, Atyraý, Qostanaı, Soltústik Qazaqstan, Batys Qazaqstan oblystarynda bilim alýshylardyń oqý jetistigi monıtorıngin júrgizý 15 sáýirden 13 mamyrǵa aýystyryldy.
«Pedagogtardy attestattaý rásimi aıasynda testileý sáýirden tamyzǵa qaraı shegerildi. Onyń ishinde sý tasqyny saldarynan turǵyn úıinen aıyrylǵan pedagogtar bul testileýdi bir jyldan keıin de óte alady», - dep túsindirdi vıtse-mınıstr.
Sonymen birge, telemarafonda mektebin sý tasqynynan qorǵaýǵa atsalysqan muǵalimder týraly sıýjet kórsetildi.
