Sý tasqyny: Atyraýdaǵy Mııaly aýylynan 559 turǵyn evakýatsııalandy
ATYRAÝ. KAZINFORM – Atyraý oblysyndaǵy Mııaly aýylynda turǵyndardy ishnara evakýatsııalaý júrgizilip jatyr. Kúndizgi saǵat 17:45-ten beri 559 adam evakýatsııalandy.
Atyraý oblystyq tótenshe jaǵdaılar departamentiniń qoǵammen baılanys tobynan málim etkendeı, evakýatsııalaý Oıyl ózeninen tasqyn sýdyń tónýine baılanysty qolǵa alynǵan.
«Oıyl ózeniniń sýy arnasynan asyp, Mııaly aýylyna qaýip tóndirdi. Osyǵan baılanysty saǵat 17:45-te aýyl turǵyndaryn qaýipsiz oryndarǵa evakýatsııalaý bastaldy. Keshki saǵat 20:30-ǵa deıin Mııaly aýylynyń 559 turǵyny kóshirildi. Onyń ishinde 327 bala bar», - dep habarlady departamenttiń qoǵammen baılanys toby.
Qyzylqoǵa aýdanynyń ákimdigi aýyl turǵyndary úshin eki mektep pen bir bala baqshany daıyndady. Máselen, H.Dosmuhameduly atyndaǵy orta mektepke 210 adam, onyń ishinde 124 bala, Y.Shórekov atyndaǵy mektep-gımnazııasyǵa 79 adam, onyń ishinde 53 bala, «Nur-Shýaq» balabaqshasyna 270 adam, onyń ishinde 150 bala ornalastyrlǵan.
Turǵyndardy evakýatsııalaýǵa tótenshe jaǵdaılar departamentiniń 12 qyzmetkeri, 2 tehnıkasy, jergilikti atqarýshy organnan 6 qyzmetker men 4 tehnıka jumyldyryldy.
«Qyzylqoǵa aýdanyna sý basý qaýpine baılanysty 31 naýryzda saǵat 19:15-te Atyraý oblystyq tótenshe jaǵdaılar departamentiniń kúshteri men quraldary kómek kórsetýge jiberildi. Qosymsha kómek tobynda 60 qyzmetker, 5 tehnıka bar», -dep málim etti departamentti ńqoǵammen baılanys tobynan.
Eske sala ketelik, buǵan deıin Atyraý oblysyndaǵy bir aýdanda tótenshe jaǵdaı jarııalanǵanyn jazǵan edik.
