Sý tasqyny: Áskerı qyzmetshiler óńirlerge attanyp jatyr
ASTANA. KAZINFORM – Qarýly kúshterdiń áskerı qyzmetshiler óńirlerdegi sý tasqynymen kúreske attanyp jatyr. Bul týraly Qorǵanys mınıstrliginiń resmı ókili Rýslan Jangýlın aıtty.
«Qarýly kúshterdiń jeke quramy sý tasqynyna qarsy jumystardy ary qaraı jalǵastyrýda. Ótken táýlikte sý tasqynyna qarsy sharalarǵa Qarýly kúshterdiń jeke quramynan 2 myńǵa tarta áskerı qyzmetshi, 83 áskerı tehnıka, 3 tikushaq jáne 4 áskerı-kólik ushaǵy jumyldyryldy. Armııa avıatsııasymen Tótenshe jaǵdaılar mınıstrliginiń 17 mamany, 74 aýyl turǵyny kóshirildi. Olardyń 47-si - bala. Áskerı-kólik ushaǵymen 303 adam, 5 tonnadan astam júk tasymaldandy jáne jeke quramnyń kómegimen 32 myńǵa jýyq qum salynǵan qap tóseldi», - dedi ol Ortalyq kommýnıkatsııalar qyzmetindegi brıfıngte.
Onyń atap ótýinshe, aýyldar jáne turǵyn úı alaptaryn sý basý qaýpine baılanysty respýblıkalyq jedel shtabtyń sheshimimen Qorǵanys mınıstrliginen qosymsha kúshter men quraldar bólindi.
«Atap aıtqanda, Oral qalasyna Qyzylordadan 200 áskerı qyzmetshi, 21 áskerı tehnıka bólindi. Atyraý oblysyna Ońtústik óńirlik qolbasshylyǵynyń áskerı bóliminen 1 myńnan asa áskerı qyzmetshi, 61 tehnıka bólinip otyr. Petropavlǵa Qaraǵandy qalasynan Astana óńirlik qolbasshylyǵynan 300-den asa áskerı qyzmetshi, 16 tehnıka jáne Oral qalasyna áskerı-kólik ushaqtarymen desanttyq-shabyldaý áskerleriniń Taldyqorǵannan 200, Almatydan 103 áskerı qyzmetshisi jetkizildi», - dedi Rýslan Jangýlın.
