Sý tasqyny: Aqtóbeniń Qobda aýdanynda 100 úı berildi
AQTÓBE. KAZINFORM - Qobda aýdanynda búgin 100 úı qoldanysqa berildi. Aýdany 80 jáne 100 sharshy metr bolatyn úı qurylysy úsh aıda aıaqtalyp tur.
Kóktemgi sý tasqynynan keıin baspanasyz qalǵan qobdalyqtar búgin qonys toıyn toılady. Buǵan deıin evakýatsııalyq pýnktte, keıin týma-týystarynyń úıinde turǵan olar búgin óz úıiniń kiltin alyp, kóshti. Tasqynnan keıin barlyǵy 147 úı salýǵa sheshim qabyldanǵan bolatyn. Qobda aýdanynyń ortalyǵynda qurylysy júrgizilgen 130 úıdiń 100-i búgin qoldanysqa berildi. Ózgesi Jaryq aýylynda.
«Sý 28 naýryz kúni kelip, bizdi evakýatsııalady. Qazir munyń bári artta qaldy. Jańa úıde 4 jan turamyz. Balam, nemerem janymda. Tasqynnan keıin 150 AEK kóleminde materıaldyq shyǵyn da óteldi», - dedi Amangeldi Jubanken.
Qobdadaǵy úılerdi salýǵa «Bolat Ótemuratov» qorynan qarjy bólindi. Qurylysty 13 merdiger júrgizdi.
«Qurylys mamyr aıynnyń basynda bastaldy. Bólek-bólek brıgada kelip, saldy. Alǵashynda qurylys jumysyn óz qarjymyzǵa bastap, irgetasy men qabyrǵasy qalanǵanda qordan aqsha bólindi. Mundaǵy qurylys materıaldary, kirpish, shatyr jabyndysy jergilikti ónim. Qurylys kezinde turǵyndar kelip, qarap júrdi. Biz barlyǵy 8 úı men mundaǵy joldy, jaıaý júrginshiler jolyn saldyq», - dedi «Babek qurylys» JShS-niń basshysy Kóbegen Ýrazov.
Aıta keteıik, kóktemgi sý tasqyny kezinde Qobda aýdanynda 288 úı sýǵa ketip, 155-i jaramsyz dep tanyldy. Al qalǵan 133 úı qaıta jóndeýge jatady. Olarǵa baǵalaý komıssııasynyń sheshimimen qarjy aýdaryldy. Sonymen birge zardap shekken turǵyndardyń tańdaýy boıynsha 8 daıyn turǵyn úı satyp alyp berdi.
«Bıyl ońaı jyl bolmady. Qysta qarly boran, kóktemde sý tasqyny bastaldy. Soǵan qaramastan bári aýyzbirshilik kórsetip, bir úıdiń balasyndaı kómektesti. Tek oblys emes, elimizdiń ózge de óńirinen kómek keldi. Bolat Ótemuratov qory qarjy bólip, qurylys júrdi. Qansha qıyndyq bolsa, artynan jaqsylyq bolady. Elimiz tynysh bolsyn. Eń qýantarlyǵy - bir úıdiń balasyndaı birge bolyp, sabyrlyq tanyttyq. Laıym solaı bolsyn! Ol úshin birge jumystanyp, jobalardy birge anyqtap, birge jumys isteýimiz kerek», - dedi Aqtóbe oblysynyń ákimi Ashat Shaharov.
Eske salsaq, Aqtóbe oblysynda sý tasqynynan zardap shekkenderge arnap 500-den astam úı salýǵa sheshim qabyldanǵan.
