Sý tasqyny: Aqtóbeniń Aqkemer aýylynda 16 úıdiń kilti berildi
AQTÓBE. KAZINFORM – Oıyl aýdany Aqkemer aýylynda 16 otbasy baspanaly boldy. Qurylys jumystaryna qarjy «Qamqor Aqtóbe-2024» qaıyrymdylyq qory arqyly ERG kompanııasynan bólindi.
Búgin Oıyl aýdanynyń Aqkemer aýylynda turǵyndar qonys toıyn toılady. Qurylysty bir merdiger kompanııa júrgizdi. Jumys maýsymda bastalyp, osy apta aıaqtalyp tur.
«Maýsym aıynda kelisimshartqa otyryp, 16 úı qurylysy bastaldy. Jańa jer tańdaldy. Barlyǵy joba boıynsha atqaryldy. Keıbir turǵyndardyń ótinishi de eskerildi. Eki bólmeni qosyp, qonaq bólme jasaýdy usynǵandary da boldy. Munda 35-40 adam turaqty jumys istedi», - dedi «Hause Master Aktobe» JShS-niń dırektory Baqytjan Knısarın.
Saraljyń aýyldyń okrýgindegi Bestamaq, Aqkemer, Kemer aýyldary sý tasqyny kezinde zardap shekti. Bestamaq eldimekeninde 2, Aqkemerde 18, Kemerde 4 úıge sý kirdi.
«Kóktemde sýdy bógeýge bar kúshimizdi saldyq. Aýyldyń er azamattarynyń bári júrdi. Biraq ál bermedi. Sodan beri 7 aı ótti. Týma-týysty jaǵalap júrdik. Qazir jańa úıge qonystanyp jatyrmyz. Memleket basshysy, oblys ákimi men aýdan basshylyǵyna alǵys aıtamyn. Úı qurylysy unady. Ózim eki bólmeni biriktilip, úlken qonaq bólmesin jasatyp aldym. Eski úıim 1980 jyldary salynǵan. Tasqan salynǵanymen, qulap qaldy. Jańa baspana salǵan kezde jerdi tańdadyq, úıimizdi áý bastan bólip berdi. Ózim qurylysty qarap júrdim», - dedi Aqkemer aýylynyń turǵyny Qýanbek Ábilǵazın.
Aqkemerde 72 úı, 400-den astam turǵyn bar.
«Aqkemerde barlyǵy 18 úıge sý kirdi. Eki otbasy Oıyl aýdany ortalyǵynan úı satyp aldy, qalǵan 16 otbasyna aýyldan úı salyndy. Sýǵa ketken úıler ózen jaǵalaýynda edi. Sol jerden qaıta úı salý qajettiligi bolmady. Turǵyndarmen kelisip, jańa jerden salyndy», - dedi Saraljyń aýyldyń okrýginiń ákimi Marat Tájiǵalıev.
Aıta keteıik, Oıyl aýdany boıynsha kóktemgi sý tasqyny kezinde 328 úı zardap shegip, 21 úı qaıta jóndeýden ótse, turǵyndardyń tańdaýy boıynsha ekinshi naryqtan 135 úı satyp alynǵan.
