Sý tasqyny: Aqtóbede jańa úılerdi salýǵa otandyq qurylys materıaldary qoldanyldy
AQTÓBE. KAZINFORM – Aqtóbe oblysynda búginde 500-den astam úı qurylysy júrip jatyr. Qurylys jumystarynyń basym bóligi aıaqtalýǵa jaqyn. Merdigerler otandyq qurylys materıaldaryna basymdyq bergen.
Aqtóbe oblysyndaǵy Áıteke bı, Yrǵyz, Qobda, Oıyl, Muǵaljar, Temir aýdandarynda qurylys jumystary júrip jatyr. Qobda, Muǵaljar aýdandarynda qazirgi kezde qurylys jumystary aıaqtalýǵa jaqyn.
- Qazirgi tańda Jaǵabulaq aýylynda 9 úı, Birlik aýylynda 5 úı salynyp jatyr. Eki aýyldaǵy turǵyn úılerdiń qurylys jumystaryn «Aılın StroıProekt» JShS-i júrgizdi. Mundaǵy qurylys materıaldary otandyq ónim. Plastıkalyq tereze, aýla ishindegi tas Aqtóbe qalasynan, al sharbaqtar Qostanaı qalasynan jetkizildi. Úıdiń irgetasyn, qabyrǵasyna qajetti ekoblok, kirpish Muǵaljar aýdany Qandyaǵash qalasynan ákelindi. Іshki jumystary aıaqtalyp, qajetti tehnıkanyń bári qondyryldy, - dedi «Aılın StroıProekt» JShS-niń ýchaske basshysy Mergen Qanaıbekov.
Al Temir aýdany Qumsaı aýylynda 21 úı salynyp jatyr. Qurylys jumystaryna eki merdiger mekeme jaýapty.
- Biz salyp jatqan 12 úıdiń syrtqy jumystary aıaqtaldy. Qurylysqa qajetti ekoton, kirpish tolyq jetkizildi. Abattandyrý jumysymen qatar ınjenerlik ınfraqurylymy retke keltirilip jatyr. Osy aıdyń ortasynda qoldanysqa bergimiz keledi, - dedi «Muǵaljar qurylys stroı» JShS-niń ýchaske basshysy Altaı Erenov.
Sonymen birge Áıteke bı aýdanyndaǵy úılerdiń bir bóligin «Ereımentaý» JShS júrgizip jatyr. Mundaǵy qurylys jumystary 20-mamyr kúni bastaldy. Qazirgi kezde jumys aıaqtalyp, qoldanysqa berý úshin qabyldap alý rásimi ótip jatyr.
Aıta keteıik, Aqtóbedegi 500-den astam úıdi 50 merdiger mekeme salyp jatyr. Úı qurylysyna qajetti qarjy BI Group, «Qazaqstan halqyna qory», ERG kompanııalar toby men Bolat Ótemuratov qory arqyly bólindi.
