Sý tasqyny: Aqtóbede úsh mektep salynady
AQTÓBE. KAZINFORM – Sý tasqyny kezinde jaramsyz bolyp qalǵan bilim ordalarynyń ornyna jańasy salynady. Keıbiri kúrdeli, aǵymdaǵy jóndeýden ótedi.
Aqtóbe oblysy boıynsha 4 balabaqshaǵa kúrdeli jóndeý jumysy júrip jatyr. Onyń ekeýi Aqtóbe qalasynda bolsa, ekeýi Muǵaljar aýdanynda. Sonymen birge Oıyl aýdany Sh.Bersıev atyndaǵy mektep-ınternatta, Temir aýdanynyń Shubarqudyq aýylyndaǵy №3 orta mektepke de kúrdelý jóndeý júrgizilip jatyr. Barlyǵy eki mektep pen tórt balabaqsha boldy.
- Aqtóbe qalasy Áýeqalashyǵy aýdanyndaǵy mektep pen Qobda aýdanyndaǵy mektep-gımnazııada aǵymdaǵy jóndeý júrip jatyr. Sandarǵa toqsalsaq, 2 mektep, 4 balabaqsha kúrdeli jóndeýden, 2 mektep aǵymdaǵy jóndeýden ótedi, - dedi Aqtóbe oblystyq Bilim basqarmasy basshysynyń orynbasary Artýr Aýezov.
Sonymen birge sý tasqyny kezinde búlinip, apatty dep tanylǵan mektepterdiń ornyna jańasy boı kóteredi.
- Yrǵyz aýdanynyń Nura aýyly Saryoba jerine kóshirilip jatyr. Onda 60 oryndyq mektep pen balabaqsha birge salynady. Al Oıyldyń Ekpetal aýylyndaǵy halyq ortalyqqa kóshirildi. Sondyqtan sol Oıyl aýdanynda mektep-balabaqsha salynady. Osy aýdandaǵy Qaratal aýylynda da balabaqsha boı kóteredi. Muǵaljar aýdanynyń Kótibar batyr aýylynda da 60 oryndyq mektep salynady. Aýdanda bir balabaqsha qurylysy júrgiziledi, - dedi Artýr Aýezov.
