Sý tasqyny: Aqtóbede polıtsııa múlikti kúni-túni kúzetedi
AQTÓBE. KAZINFORM – Aqtóbe oblysynda 430 úıdi sý basty. Qazirgi kezde qala mańyndaǵy Aqtóbe jáne Sazdy sý qoımasy tolyp, sý jiberilip jatyr. Al eń iri sý qoımasy Qarǵalyda jaǵdaı baqylaýda tur.
Aqtóbe qalasynda tótenshe jaǵdaı jarııalanǵan soń Elek pen Qarǵaly ózenderiniń jaǵasynda ornalasqan úılerdiń turǵyndary keshe evakýatsııalandy. Búginde bul úılerdiń turǵyndary shahardaǵy 40 evakýatsııalyq beketti panalap otyr. Al úı mańynda kúzetke er adamdar qalǵan. Elek ózeni mańynda sý deńgeıin qarap, fotoǵa túsirip júrgen Oryn Tóreǵazıev turǵyndardy sabyrǵa shaqyrdy.
— Úıdiń qasynda bolǵan soń kelip turmyn. Ózim Zarechnyı-2 turǵyn alabynda turamyn. Qazir jumys barlyq jerde atqarylyp jatyr. Halyqqa tynyshtyq, sabyr tileımin. Birimiz biriksek, bárin jeńýge bolady, — dedi Oryn Tóreǵazıev.
Aqtóbeniń Elek ózeni boıyn jaǵalaı ornalasqan úılerdiń turǵyndary birigip, bekitý jumystaryn atqaryp jatyr. Olardyń bar oıy — baspanany saqtap qalý.
— Turǵyndar men tótenshe jaǵdaılar qyzmeti Elek ózeniniń jaǵasyn bekitip jatyrmyz. Bul biz úshin mańyzdy. Elek bul joly 2 metrge kóterildi. Biz 1 shaqyrymǵa deıingi aýmaqty bekittik. Jumysty ári qaraı jalǵastyra beremiz, — dedi qala turǵyny Samat Ermaǵambetov.
Aqtóbe oblystyq TJD baspasóz qyzmetiniń derekterine súıensek, qazirgi tańda 430 úıdi sý basty. Barlyǵy 2 myńnan astam adam evakýatsııalyq beketterde otyr. Sonymen birge 500-ge jýyq adam týma-týystaryna bardy. Tótensh jaǵdaılar qyzmeti adammen qatar tórt túlikte de aıdap, keıde qaıyqqa salyp qutqaryp jatyr.
— Ótken táýlikte, táýliktiń túngi ýaqytyn qosa alǵanda, qaýipti ýchaskelerde shamamen 47 800 dana qum toly qap jáne 5 222 tonna ınertti materıal tóseldi. Barlyǵy 231 myń tekshe metr sý soryldy. Avarııalyq-qutqarý jáne shuǵyl jumystarǵa1735 adamy, 400-den astam tehnıka jumyldyryldy. Qazir Jedel jeli telefony jumys isteıdi. Oǵan 123 qońyraý tústi, — dep habarlady Aqtóbe oblystyq PD baspasóz qyzmeti.
Aqtóbe qalasyndaǵy Kirpishti turǵyn alabynyń turǵyndary qazir alma-kezek úıiniń jaǵdaıyn bilip júr. Olar úılerine qaıyqpen baryp, keledi.
— 2017 jyly úıimiz sýǵa ketti. Bıyl da qaıtalanyp otyr. Jańa ǵana baryp, qarap keldim. Sý terezege jaqyndap qalǵan. Zattarym qymbat, sony qarap keldim, — dedi qala turǵyny Aıgerim.
Aqtóbe qalasynyń jastary birneshe topqa bólinip, kómektesti. Olar avtoeriktiler, qol kúshin beretin eriktiler bolyp bólindi.
— Keshe túnde 4-5 saǵat ishinde myńnan astam kólik jınaldy. Olar qaladaǵy túrli markaly kóliktiń basyn qosyp otyrǵan júrgizýshiler. Bári de turǵyndardy tasymaldady, kómek kórsetti. Bul úlken kómek, kúsh boldy. Shynymdy aıtsam, osynsha adam keledi dep oılamappyz. Evakýatorlar da kómek berdi. Halyqtyń kómegi súısintti, qýanatty. Tańda qaıyqtyń kómegi qajet boldy. Oǵan da turǵyndardan kómek boldy, — dedi Álisher Sadyq.
Qazir turǵyndardyń múlkin, qaýipsizdikti polıtsııa men áskerıler kúzetip tur.
— Oblys polıtseıleri qoǵamdyq qaýipsizdikti qamtamasyz etip jatyr. Búgin úshinshi kún. Úılerden evakýatsııa jasaý jáne sol úılerde urlyqtyń bolmaýyn qamtamasyz etý mindetimiz. Jolda da baqylaý júrip jatyr, — dedi Aqtóbe oblystyq PD bastyǵynyń birinshi orynbasary Ardana Saımaǵambetov.
Vıdeo: Altynaı Saǵyndyqova/Kazinform
