Sý tasqyny: Aqtóbede 16 aýylda jol qatynasy úzildi

AQTÓBE. KAZINFORM – Aqtóbe oblysynda 8 joldy sý shaıyp ketken. Qazir 16 aýylǵa qatynas joq.

Aqtóbe oblystyq TJD-i óńirdegi jaǵdaı týraly sońǵy málimetterdi taratty. Kóktemgi sý tastyǵy kezeńi bastalǵaly beri joldan sý óteýdiń 15 deregi tirkeldi. Bul respýblıkalyq, oblystyq, aýdandyq mańyzy bar joldar. Sonymen birge oblysta barlyǵy 8 joldy sý shaıdy. 

— Sý ótý, sý shaıýdyń saldarynan 16 aýylǵa qatynas úzildi. Olar Qobda, Muǵaljar, Oıyl, Alǵa aýdandaryndaǵy aýyldar. Barlyǵy 58 turǵyn úıge, sonymen birge 10 baý-baqsha ujymyndaǵy úıge sý kirdi. 225 aýlada sý tur. Bul Temir, Shalqar, Muǵaljar, Qobda, Oıyl aýdandary men Aqtóbe qalasyndaǵy jaǵdaı. Qazir 50 myń tekshe metr sý soryldy. 40 myń qum toly qap tóseldi. 4 myń tonna ınetti materıal jetkizildi, — dedi Aqtóbe oblystyq TJD bóliminiń bastyǵy Taras Kovalenko.

Onyń aıtýynsha, búgingi deıin 761 adam evakýatsııalandy. Onyń 328-i bala. Evakýatsııalanǵan adamdardyń 411-i aldyn ala daıyndalǵan oryndarǵa ornalastyryldy. Sonymen birge óńirde 129 bas mal da qaýipsiz jerge jetkizilgen. 

— Aldyn alý, qutqarý jumystaryna barlyǵy 1500 adam, 328 tehnıka jumyldyryldy. Qazir Baıǵanınniń Jańatań aýylynda, Qobdanyń Tasótkel aýylynda, Temirdiń Sarkól, Qobdanyń Qobda aýylynda tasqynǵa qarsy kúres jumysy júrip jatyr. Qobda ortalyǵynda TJ vıtse-mınıstri Erlan Nurpeıisov bar. Ol bárin ózi jeke baqylap otyr, — dedi Taras Kovalenko.

Aıta keteıik, óńirdegi Qobda aýdanynda jergilikti deńgeıde tótenshe jaǵdaı jarııalandy.