Aqtóbelik muǵalimder balaly otbasylardy aýylǵa kóship kelýge shaqyrdy
AQTÓBE. KAZINFORM – Qobda aýdany Aqsaı bastaýysh mektebiniń ujymy áleýmettik jeli arqyly habarlandyrý berip, balaly otbasylardy aýylǵa shaqyrdy. Munda jeke kásipker alyp qoıǵan úı beriledi. Tipti aýyl halqy qysqa qajetti otyny men baǵatyn mal ázirlep qoıǵan.
Qobda aýdany Aqsaı aýylyndaǵy bilim ordasy buǵan deıin negizgi mektep boldy. Sońǵy 2020-2021 oqý jylynan bastap bastaýysh mektep bolyp ózgerdi. Aýylda 26 úı bar. Buǵan deıin 7 bala bilim alsa, qazir 3-eýi bala ǵana qaldy. Mektep ujymy bilim ordasy jabylyp qalmaýy úshin jan-jaqqa habarlandyrý berip, kóship kelýshilerdiń bar jaǵdaıyn jasamaq nıette.
«Biz bastaýysh synypta oqıtyn balalary bar otbasyny izdep jatyrmyz. Byltyrǵy oqý jylynda bizde 7 bala boldy. Onyń ekeýi 4-synypty bitirdi, ekeýiniń otbasy kóship ketti. Qazir úsh bala ǵana qalyp tur. Mektepti saqtap qalý úshin taǵy eki oqýshy kerek. Habarlandyrý bergen soń bir otbasy habarlasty. Qazir mekteptiń 2 muǵalimi sol otbasyny aýylǵa alyp kelý úshin jolǵa shyqty. Aýyldan ketken adamdardyń úıin satyp alǵan kásipker sol baspanany beredi. Aýyl adamdary mal beredi, qysta jaǵatynyn otynyn daıyndaıdy. Kóship kelýshilerge úıdi tazartyp, ázirlep qoıamyz», - dedi Aqsaı bastaýysh mektebiniń meńgerýshisi Dına Bekeeva.
Onyń aıtýynsha, byltyr da dál osyndaı jolmen aýylǵa eki balasy bar bir otbasy kóship bardy.
«Aýylda sýǵa súzgi qondyrylǵan. Jolymyz jasalyp jatyr. Mal ustaýǵa óte yńǵaıly. 2025-2026 jyldary gaz qubyry tartylady dep jatyr. Aýyldan kóshkimiz kelmeıdi. Mektepte otyrǵan muǵalimderdiń eńbek ótili 25-30 jyl bolady. Qazir 3 muǵalim bar. 8-i kishi qyzmetker. Barlyǵy 11 jumys orny. Mektep ǵımaratynda klýb pen medpýnkt bar. Mektep kómirmen jylytylady. Qazandyq mektep janynda bólek ornalasqan», - dedi Dına Bekeeva.
Aıta keteıik, Aqsaı aýylynda 27 úı bar. Qobda aýdanynan 15 shaqyrym qashyqtyqta ornalasqan aýyldaǵy úı baǵasy shamamen 500 myń teńge.
