Sý tasqyny: Aqtóbe qalasynda búginge deıin 178 páter berildi

AQTÓBE. KAZINFORM – Aqtóbe qalasy boıynsha túrli qor arqyly 190 úı satyp alynady. Qazirgi kúni onyń 178-i alyndy.

Aqtóbe qalasy ákiminiń baspasóz qyzmetiniń habarlaýynsha, sý tasqyny saldarynan jalǵyz baspanasy apatty dep tanylǵan turǵyndar úshin qorlar arqyly 190 páter alyp beriledi. 

— Búgingi kúni 178-i alyp berildi. BI Group 14, «Qamqor-Aqtóbe 2024» 66, Bolat Ótemuratov qory 98 úı satyp aldy. Sonymen birge «Otbasy bank» arqyly 100 páter satyp alý jobasy jalǵasyp jatyr. Qujat tapsyrǵandardy tizimge engizip, bank talaptaryna sáıkes kelgen jaǵdaıda Aqtóbe oblystyq Energetıka basqarmasy arqyly bankke joldama beriledi. «Otbasy bankke» 107 otbasynyń tizimi berildi. Onyń 40-y banktiń kelisimin aldy. Qalǵanynyń tólem qabileti, basqa da talaptary sáıkes kelýi tekserip jatyr, - dep habarlady Aqtóbe qalasy ákiminiń baspasóz hatshysy Aıgúl Baımenova. 

Aıta keteıik, sý tasqyny kezinde Aqtóbe qalasy boıynsha 3500-den astam otbasy zardap shekti. Tehnıkalyq tekserý, baǵalaý jumystary kezinde 190 úı jaramsyz dep tanylǵan. 

Qor arqyly páter satyp alýmen qatar Otbasy bank arqyly nesıe rásimdeýge múmkindik jasalady. Tek úıdiń quny 15 mln teńgeden aspaýy kerek.