Sý salasy mamandary Qytaıda biliktilikti arttyrý kýrstarynan ótýdi bastady
ASTANA. KAZINFORM — «Jumysshy mamandyqtarynyń jyly» aıasynda sý sharýashylyǵy salasyna mamandardyń jańa býynyn daıarlaý bastaldy. Bul týraly Úkimet málim etti.
2025 jylǵy 9 sáýirden bastap Mınıstrliktiń bastamasymen qazaqstandyq sý salasy mamandarynyń birinshi toby QHR-da biliktilikti arttyrý kýrstarynan ótýdi bastady. Birinshi topqa 30 maman kirdi. Budan ári Qytaıda 25 adamnan turatyn taǵy 3 top bilim alady. Jalpy kórshi elde eki aptalyq biliktilikti arttyrý kýrstarynan sý salasynyń 105 mamany ótedi.
Qazaqstandyq mamandar joǵary oqý oryndarynda emes, Qytaı Halyq Respýblıkasynyń óndiristik ýchaskeleri men nysandarynda «Power China» qytaı kompanııasymen qol qoıylǵan memorandým sheńberinde biliktilikti arttyrý kýrstarynan ótedi. Kýrstardyń taqyryptary qajettilikterge sáıkes ótkiziledi:
- sý sharýashylyǵy obektilerin josparlaý, sý tasqynynyń aldyn alý jáne tabıǵı apattardan bolatyn zalaldy azaıtý boıynsha;
- tabıǵı apattardan keıin qalpyna keltirý jáne sý sharýashylyǵy obektilerin josparlaý boıynsha;
- sý resýrstaryn ıgerý jáne paıdalaný jáne sýdy basqarý boıynsha;
- sý resýrstaryn basqarý jáne aǵyndy sýlardy tazartý boıynsha.
Kýrstardan ótý kezeńindegi barlyq shyǵyn qytaı tarapynyń esebinen jabylady.
Vedomstvonyń málimetinshe, Árbir óńirde sý sharýashylyǵy kommýnaldyq uıymdaryn qurý, sondaı-aq sý sharýashylyǵy uıymdary qyzmetkerleriniń aldaǵy 4-5 jylda zeınetke shyǵýy jóninde Úkimet qabyldaǵan sheshimdi eskere otyryp, sý sharýashylyǵy mamandaryna qajettilik 1,7 myń adam mólsherinde boljanyp otyr.
Osyǵan baılanysty sý sharýashylyǵy salasyndaǵy kadrlar tapshylyǵyn boldyrmaý úshin ǵylym jáne joǵary bilim, sý resýrstary jáne ırrıgatsııa, sondaı-aq oqý-aǵartý mınıstrlikteri sý salasy úshin kadrlar daıarlaý jónindegi 2024-2025 jyldarǵa arnalǵan jol kartasyn qabyldady.
— Jol kartasy sý salasynyń mamandaryna eńbek naryǵynyń qajettilikterine taldaý júrgizýdi kózdeıtin 28 is-sharadan turady. Qujatta bilim berý baǵdarlamalaryn jańartý, joǵary jáne joǵary oqý ornynan keıingi bilim berý uıymdarynyń materıaldyq-tehnıkalyq bazasyn, sondaı-aq tehnıkalyq jáne kásiptik bilim berýdi jaqsartý kózdelgen, — delingen habarlamada.
Budan basqa, Qazaqstan Respýblıkasynyń Sý resýrstaryn basqarý júıesin damytýdyń 2024-2030 jyldarǵa arnalǵan tujyrymdamasyna sáıkes sý salasy úshin kadrlar daıarlaýdy jaqsartý maqsatynda bilim berýdiń ınnovatsııalyq ádisterin qoldana otyryp, jańa kásiptik standarttar men bilim berý baǵdarlamalaryn ázirleý qarastyrylǵan.
Sondaı-aq 2023 jyly Mınıstrlik janynan Sý qoryn paıdalaný jáne qorǵaý, sýmen jabdyqtaý, sý burý jáne ırrıgatsııa salasyndaǵy kásiptik biliktilik jónindegi salalyq keńes qurylyp, jumys istep jatyr. Onyń quramyna sý salasy úshin kadrlar daıarlaýmen aınalysatyn JOO men kolledjderdiń professorlary men oqytýshylary kirdi.
2024 jyly Salalyq keńes «Gıdrotehnıkalyq melıoratsııa» jáne «Bógetter men dambylar qurylysy» eki kásibı standartyn, sondaı-aq «Sý sharýashylyǵy» salalyq biliktiligin ózektendirip, bekitti.
Sondaı-aq 2027 jylǵa deıin sý salasynyń kadrlaryn daıarlaý sapasyn odan ári jaqsartý úshin 9 jańa kásibı standarttardy ózektendirý jáne ázirleý josparlanýda.
Joǵaryda atalǵan standarttar negizinde joǵary oqý oryndary men kolledjder jumys berýshilerdiń qajettilikterin eskere otyryp, ózderiniń bilim berý baǵdarlamalaryn jańartady.
Eske sala keteıik, búgin Sý sharýashylyǵy qyzmetkerleri kásibı merekesin atap ótedi.