Sý resýrstary mınıstrligi sýdy ortaq paıdalanýdyń erejelerin bekitti
ASTANA. KAZINFORM – Jańa Sý kodeksine sáıkes, jeke jáne zańdy tulǵalardyń azamattardyń sý nysandaryna kirýin shekteýge quqyǵy joq. Eger zańda kórsetilmese, qorshaýlar, kúzet nemese ózge de shekteýler qoıýǵa tyıym salynady. Bul týraly vedomstvonyń baspasóz qyzmeti málim etti.
Osy normanyń saqtalýyn qamtamasyz etý úshin Sý resýrstary jáne ırrıgatsııa mınıstrligi azamattardyń eldiń sý nysandaryna qoljetimdiligin retteıtin Sýdy ortaq paıdalanýdyń úlgilik qaǵıdalaryn bekitti.
Ereje boıynsha, sýdy arnaıy paıdalaný men ortaq paıdalaný arasynda aıyrmashylyq bar. Sýdy ortaq paıdalaný úshin ruqsat alý talap etilmeıdi, azamattar sý nysandarynyń jaǵalaýyna erkin óte alady. Demalys, týrızm, shomylý, áýesqoı balyq aýlaý jáne jaıylym aımaqtarda mal sýarýǵa ruqsat etiledi.
Jergilikti atqarýshy organdar jappaı demalys aımaqtaryn aıqyndaýǵa jáne bul týraly halyqty habardar etýge mindetti. Kólik jýý, janar-jaǵarmaı materıaldaryn saqtaý jáne t. b. sııaqty sý nysandaryn lastaıtyn áreketterge tyıym salynady.
— Týrızm, ózen-kólderde shomylý, balyq aýlaý, serýendeý — munyń bári jańa Sý kodeksinde bekitilgen sýdy ortaq paıdalaný quqyǵyna kiredi. Árbir azamat, eger bul kásipkerlik qyzmetpen baılanysty bolmasa, jeke maqsattary úshin sýdy ortaq paıdalanýǵa quqyly. Qorshaýlar men basqa da shekteýlerdi ornatýǵa tyıym salynady. Eskeretin taǵy bir jaǵdaı — bul jergilikti atqarýshy organdar resmı túrde belgilegen uıymdastyrylǵan jaǵajaılardyń jumysyna qatysty. Mundaı jerlerde aqyly qyzmetter kórsetilýi múmkin, biraq tólem sýǵa ótý úshin emes, qosymsha servıs úshin ǵana alynady, — dedi Sý resýrstary jáne ırrıgatsııa mınıstri Nurjan Nurjigitov.
Eske sala keteıik, buǵan deıin jańa sý kodeksine saı sý resýrstaryn basqarý tásilderi qaıta qaralyp jatqanyn jazǵan edik.