Sý resýrstary mınıstrligi Araldaǵy sý deńgeıine túsinik berdi
ASTANA. KAZINFORM – Kóktemdegi sý tasqyny kezinde elimizdiń sý qoımalaryna 75 mlrd tekshe metr sý jınaldy. Bul týraly QR Sý resýrstary jáne ırrıgatsııa mınıstrliginiń resmı ókili Móldir Ábdýalıeva aıtty.
«Sý tasqyny kezinde elimizdiń sý qoımalaryna 75 mlrd tekshe metr sý jınaldy. Bul ótken jylmen salystyrǵanda 15 mıllıard tekshe metrge artyq. Jınalǵan sýdyń 12 mlrd-tan astamy kólemi tasqyn sýǵa tıesili. Qazirgi kezde Qazaqstannyń soltústik, ortalyq, shyǵys jáne batys óńirleriniń sý qoımalary 80 paıyzǵa toly», - dedi M. Ábdýalıeva Ortalyq kommýnıkatsııalar qyzmetindegi baspasóz máslıhatynda.
Onyń aıtýynsha, vegetatsııaǵa daıyndyq aıasynda mınıstrlik qyzmetkerleri júzden astam sý beketin jóndep, qalpyna keltirdi, 700 shaqyrymnan astam kanaldy tazartty. Sondaı-aq elimizdiń 11 óńirinde 98 gıdrotehnıkalyq qurylys nysany jóndeldi.
«Sý dıplomatııasynyń jáne kórshi eldermen birlesken jumystyń nátıjesinde mınıstrlik Qazaqstannyń ońtústik óńirlerin qajet sý mólsherimen qamtamasyz etti. Bıyl sýarý maýsymynda kórshi elderden keletin sýdyń kólemi bastapqyda kelisilgen kólemnen artyq bolǵanyn atap ótkim keledi. Osynyń arqasynda biz Aral teńizine sý jiberý kólemin arttyrdyq. Bıyl Soltústik Aralǵa shamamen eki mlrd tekshe metr sý jiberildi, al teńizdegi sýdyń jalpy kólemi 22 mıllıard tekshe metrge jetti. Keıingi jyldary Soltústik Aralda sý kólemi azaıǵanymen, 2024 jyldyń basynan ortasha sý deńgeıi qaıta kóterile bastady», - dedi resmı ókil.
Onyń sózine qaraǵanda, Qazaqstan, Qyrǵyzstan, Tájikstan, Túrikmenstan jáne Ózbekstannyń qatysýymen ótetin Ortalyq Azııanyń Memleketaralyq sý sharýashylyǵyn úılestirý komıssııasynyń aldaǵy otyrysynda Naryn-Syrdarııa sý qoımalary kaskady jumysynyń boljamdy kestesi jasalady, sondaı-aq keler jylǵy sýarý maýsymyna deıingi kezeńinde sý berý kólemi bekitiledi.
«Qazaqstannyń Sý resýrstary jáne ırrıgatsııa mınıstri men Ózbekstannyń Sý sharýashylyǵy mınıstri Syrdarııa ózeninde sýdy avtomatty esepke alý júıesi ornatylatyn 10 sý beketin anyqtady. Bul transshekaralyq sý resýrstaryn dál bólýge múmkindik beredi. Budan bólek, Qazaqstan men Qytaı eki el arasyndaǵy transshekaralyq sý resýrstaryn bólý týraly úkimetaralyq kelisimniń jobasyn ázirlep jatyr. Qujatty eki memlekettiń mamandary kiretin birlesken jumys toby ázirlep otyr. Kelisim jasaýdaǵy negizgi maqsat – Balqash kólin qalypty deńgeıde saqtaýǵa kepildik beretin sý kóleminiń kelýin qamtamasyz etý», - dedi Móldir Ábdýalıeva.
Budan buryn habarlanǵandaı, bıyl sharýalarǵa 11 mlrd tekshe metr sý berildi.
Aıta keteıik, bıyl qyrkúıek aıynyń basynda Májilis depýtat Marhabat Jaıymbetov Aral teńizi problemasyna qatysty usynys aıtty.
