Sý qoımalary kóktemge daıyn ba: 1500-den asa gıdrotehnıkalyq qurylys tekserýden ótti

ASTANA. KAZINFORM —   Sý jáne ırrıgatsııa mınıstrliginiń basseındik ınspektsııalary Tótenshe jaǵdaılar mınıstrligi jáne jergilikti atqarýshy organdarmen birlesip elimizdegi 1502 gıdrotehnıkalyq qurylysqa zerdeleý júrgizdi. Bul shara  sý tasqyny kezeńine daıyndyq aıasynda júrgizildi, dep habarlady vedomstvodan. 

Tekserý nátıjesinde gıdrotehnıkalyq qurylystardyń ıelerine anyqtalǵan kemshilikterdi joıý boıynsha usynystar berildi. Aıta keteıik, elimizde 8 basseındik ınspektsııa bar. Ol Aral-Syrdarııa, Balqash-Alakól, Ertis, Esil, Jaıyq-Kaspıı, Nura-Sarysý, Tobyl-Torǵaı jáne Shý-Talas basseındik ınspektsııalary.

«Barlyq sý qoımalary bekitilgen keste boıynsha jumys isteıdi, jospar sý tasqynyna qatysty boljamdarǵa baılanysty túzetiletin bolady. Kóktemgi sý tasqyny kezinde erigen qar sýyn qabyldaýǵa bos oryndy qamtamasyz etý úshin eldiń soltústik, batys, shyǵys jáne ortalyq sý qoımalarynan sý jiberildi. Qazaqstannyń ońtústigindegi sý qoımalary sý jınaý rejıminde jumysyn jalǵastyrýda», - dep málimdedi Sý resýrstaryn retteý, qorǵaý jáne paıdalaný komıteti tóraǵasynyń mindetin atqarýshy Gúlmıra Imasheva.

Eske sala keteıik,  buǵan deıin jazǵanymyzdaı cý tasqyny keler jyly da qaıtalana ma, saladaǵy sarapshylar qandaı boljam aıtyp otyr, daıyndyq júrgizilip jatyr ma degen saýalǵa jaýap izdeseńiz, osy maqalany oqı otyryńyz. 

Aqmola oblysyndaǵy «Qazsýshar» fılıaly Sileti sý qoımasyndaǵy qaqpalardy jóndegenin jazǵan edik.