Sý dıplomatııasy: Ortalyq Azııa men Aýǵanstan yntymaqtastyqty nyǵaıtýǵa múddeli
TAShKENT. KAZINFORM — Ózbekstan astanasynda «Ortalyq Azııadaǵy sý dıplomatııasy: turaqty damýǵa negizdelgen senim, dıalog jáne yntymaqtastyq» taqyrybynda halyqaralyq ǵylymı-praktıkalyq konferentsııa ótti, dep habarlaıdy Kazinform agenttiginiń menshikti tilshisi.
Іs-sharany Ózbekstan prezıdenti janyndaǵy Strategııalyq jáne óńiraralyq zertteýler ınstıtýty uıymdastyrdy. Oǵan Ortalyq Azııa elderi sý sharýashylǵy mınıstrlikteriniń mamandary, halyqaralyq uıymdar men taldaý ortalyqtarynyń ókilderi qatysty. Sonymen qatar, mundaı formattaǵy basqosýda alǵash ret Aýǵanstan delegatsııasy tóbe kórsetti.
Konferentsııada alǵash bolyp sóz alǵan Strategııalyq jáne óńiraralyq zertteýler ınstıtýty dırektorynyń orynbasary Akramjon Nematov sý dıplomatııasyn damýǵa negiz bolatyn yntymaqtastyq quraly retinde qarastyrýdyń mańyzyna toqtaldy.
— Meniń oıymsha, sý resýrstaryn basqarý jáne ony tıimdi paıdalanýǵa baǵyttalǵan dıalogtarǵa Aýǵanstandy qosý úlken jetistik. Muny júrgizilip jatqan júıeli saıasattyń nátıjesi dep bilemiz. Sý dıplomatııasyn yntymaqtastyqty ilgeriletýge baǵyttalǵan qural ǵana emes, sonymen birge oǵan birlesip órkendeýge jol ashatyn uzaq merzimdi strategııa turǵysynan qaraý mańyzdy. Osyndaı formattaǵy is-sharalar qolaıly dıalog ornatýǵa sep bolary sózsiz. Ár taraptyń pikiri men múddesin eskerip, teńgerimdi sheshim qabyldaý úshin áýeli syndarly dıalog qajet, — dep málim etti Akramjon Nematov forým aıasynda Kazinform tilshisiniń saýalyna jaýap bere otyryp.
Spıker atap ótkendeı, keıingi jyldary Aýǵanstan óńirdegi sý resýrstaryn basqarý men paıdalanýdy retteýge baǵyttalǵan dıalogtarǵa qatysýǵa qyzyǵýshylyq bildire bastady.
— Ortalyq Azııa elderi egemendik alǵannan keıin sý sharýashylyǵy salasyndaǵy kelisimderdi jasaý barysynda kelissózderge Aýǵanstan tarapyn tartý kerektigi jaıly usynys kóterdi. Óıtkeni, biz bul memleketpen bir ózenniń sýyn bólisip otyrmyz. Degenmen ol kezderi Aýǵanstanda soǵys bolyp jatty. Búgingi tańda atalǵan elde jańa bılik ornady. Olar memlekettegi jaǵdaıdy turaqtandyrýǵa kúsh salyp keledi. Tıisinshe, qazirgi ýaqytta Aýǵanstan tarapynan sý máselesine qatysty dıalogtarǵa qatysýǵa qyzyǵýshylyq artqanyn baıqap otyrmyz, — dedi Akramjon Nematov.
Osy oraıda saıasattanýshy Ortalyq Azııa men Aýǵanstan úshin Turaqty damý maqsattary jónindegi BUU Óńirlik ortalyǵyn Almatyda qurý týraly Qazaqstan bastamasyn atap ótti.
— Naýryzda BUU-nyń Bas Assambleıasynda Almaty qalasynda Ortalyq Azııa men Aýǵanstan úshin Turaqty damý maqsattary jónindegi BUU Óńirlik ortalyǵyn qurý týraly qarar qabyldandy. Bul bastamany Qazaqstan Prezıdenti Qasym-Jomart Toqaev kótergen bolatyn. Osy rette tıisti qujatta sý sharýashylyǵy salasyndaǵy ózara is-qımyldar basym baǵyt retinde aıqyndalǵan. Bul óz kezeginde óńirdegi barlyq múddeli elderdiń ortaq ustanymǵa uıyp, sáıkesinshe yntmaqtastyqty ilgeriletýine yqpal etedi, — degen pikirde Akramjon Nematov.
Konferentsııada baıandama jasaǵan aýǵanstandyq delegatsııa basshysy Nesar Mohammad Nýman da óńiraralyq baılanystardy ózara senimge negizdelgen yntymaqtastyq nátıjesinde damytýǵa bolatynyn málim etti.
— Uzaq jyldarǵa jalǵasqan Aýǵanstandaǵy turaqsyzdyqtan keıin biz yntymaqtastyqqa daıynbyz. Ortalyq Azııa elderi men kórshiles ózge de memleketterdiń sý resýrstaryn tıimdi basqarý jáne paıdalaný salasynda tájirıbesi mol. Bul rette Aýǵanstandaǵy ırrıgatsııa júıelerin damytý qajet. Sý dıplomatııasy biz úshin jańa baǵyt ári múmkindik, — dedi Aýǵanstan ýaqytsha úkimetiniń Energetıka jáne sý sharýashylyǵy mınıstrligine qarasty Sý resýrstaryn retteý basqarmasynyń basshysy Nesar Mohammad Nýman.
Eske salaıyq, taıaýda Sý resýrstary jáne ırrıgatsııa mınıstri Nurjan Nurjigitov Qazaqstanda Qytaımen sý bólý kelissózderin júrgize alatyn neshe dıplomat bar ekenin aıtqan bolatyn.
Sonymen qatar mınıstr Nurjan Nurjigitov Ózbekstanda ótken Klımat forýmy aıasynda Kazinform tilshisine suhbat berip, sý tapshylyǵy máselesin sheshýge baǵyttalǵan jobalardyń barysyn baıandady. Atap aıtqanda, vedomstvo basshysy sýdy yntymaqtastyq qurý resýrsy retinde qarastyrýdyń mańyzyna toqtaldy.