Sý basýy múmkin: Qyzylorda oblysynda 31 eldi meken qaýipti aımaqta
QYZYLORDA. KAZINFORM – Qyzylorda oblysynda tótenshe jaǵdaılar kezinde 130,5 myńǵa jýyq adamdy 151 qabyldaý jáne jınaqtaý pýnkti qabyldaýǵa daıyn. Bul týraly oblystyq tótenshe jaǵdaılar departamentinen málimdedi.
Atalǵan oryndar generator, tósek-oryn, jınalmaly kereýettermen jáne basqa da qajetti jabdyqtarmen qamtamasyz etilgen.
- Pýnkter týraly jáne olarǵa baratyn eń qysqa joldar týraly derek «ıAndeks Karty», «2GIS», «SmartQyzylorda» platformalarynda kórsetilgen. Al tolyq aqparat ınternet-portaldarda, áleýmettik jelilerde, ákimdikterdiń resmı saıttarynda jarııalandy, - dedi departament bastyǵynyń orynbasary, polkovnık Bekbolat Ábdiqadyrov.
Sý basý qaýpi bar eldi mekenderde 53 evakýatsııalyq jınaqtaý pýnkti, 36 evakýatsııalyq qabyldaý pýnkti ornalasqan.
- 31 eldi meken sý basý aımaǵynda. Bul — 83,5 myńnan astam turǵyn nemese 16,5 myńnan astam úı qaýipti tizimde degen sóz. Al 9 eldi meken 6-8 baldyq seısmıkalyq, 2 eldi meken kómirsýtek shıkizatyn óndirýge baılanysty tizimge engizilgen. Tótenshe jaǵdaılar mınıstrliginiń tapsyrmasyna sáıkes tótenshe jaǵdaı bolǵanda 102 myńnan astam zardap shegýshini qabyldaıtyn shatyrly qalashyqtar ornalastyrýǵa aýmaǵy 15 gektar 14 jer ýchaskesi bekitildi. Halyqty evakýatsııalaý oryndary daıyndaldy, - dedi Bekbolat Ábdiqadyrov.
Qysqy ýaqytta kólikterdiń dittegen jerine durys jetýi úshin 12 jylytý pýnkti jumys istep tur. Olar Qyzylorda-Jezqazǵan, Qarabutaq-Qyzylorda-Shymkent avtojoldarynda ornalasqan. Osy oraıda qutqarýshylar oblys turǵyndary men qonaqtardan jolǵa shyǵar aldynda barlyq eskertpege nazar aýdarýdy suraıdy.
Eske salsaq, Aqtóbe oblysynda sý tasqynynyń aldyn alý jumystaryna bıyl 6,5 mlrd teńge bólindi.