Sý basý qaýpi edáýir tómendeıdi: Damý bankiniń qarajaty qaıda baǵyttalady
ASTANA. KAZINFORM — QR Sý resýrstary jáne ırrıgatsııa mınıstri Nurjan Nurjigitov qarjy ınstıtýttarynan tartylatyn qomaqty qarajat qaı baǵytta ıgeriletinin túsindirdi.
- Aldaǵy jumystardyń aýqymdylyǵy men óńirlerge qajetti kúrdeli ınvestıtsııalar kólemin eskere otyryp, sheteldik qarjy ınstıtýttaryn tartý boıynsha belsendi jumys júrgizilip jatyr. Búgingi tańda Islam damý bankiniń dırektorlar keńesi jalpy quny 2,7 mlrd AQSh dollaryn quraıtyn nesıe men grant bólý týraly sheshim qabyldady. Joba eki kezeńmen iske asyrylady, - dedi N. Nurjigitov Parlament Májilisindegi sý sharýashylyǵy salasyn reformalaý taqyrybyndaǵy Úkimet saǵatynda.
Mınıstrlik aqparatyna qaraǵanda, I kezeń (2025–2027 jj.) boıynsha kelisim somasy – 1,153 mlrd AQSh dollaryn quraıdy. II kezeń (2027–2029 jj.) aıasynda 1,6 mlrd AQSh dollary kóleminde ınvestıtsııa tartý kózdelgen. Nesıe qarajaty esebinen 2025 jyly elimizdiń óńirlerinde tórt sý qoımasynyń qurylysy bastalady.
- Atap aıtqanda, ońtústik óńirlerde ornalasqan Aqmola, Qalǵuty jáne Qaraózek sý qoımalary jańadan aınalymǵa engiziletin 22,5 myń gektar sýarmaly jerdiń vegetatsııalyq kezeńindegi sý tapshylyǵyn óteýge baǵyttalady. Sonymen qatar, Batys Qazaqstan oblysynda Úlken Ózen ózeninde salynatyn sý qoımasy (28 mln m³) tasqyn jáne erigen sýlardy jınaýǵa, sondaı-aq Qaztalov aýdanyndaǵy eki eldi mekendi (shamamen 5 myń adam) sý basý qaýpinen qorǵaýǵa múmkindik beredi. Birinshi kezeń aıasynda sonymen qatar Jambyl oblysyndaǵy Teris-Aşybulaq pen Qaraqońyz sý qoımalaryn jáne Túrkistan oblysyndaǵy Qosqorǵan men Kóksaraı kontrretteýishin rekonstrýktsııalaý kózdelgen. Buǵan qosa, Almaty, Jambyl, Jetisý, Batys Qazaqstan, Qyzylorda jáne Túrkistan oblystarynyń aýmaǵynda jalpy uzyndyǵy 3452 shaqyrymdy quraıtyn 115 ırrıgatsııalyq kanaldy tsıfrlandyrý elementterimen jańǵyrtý josparlanýda. Jobalar tizbesine Túrkistan oblysyndaǵy «Turan sý» jáne Almaty oblysyndaǵy «Almatyoblsýshar» kommýnaldyq sharýashylyq nysandaryna arnalǵan jumystar da engizilgen, - dedi vedomstvo basshysy.
Onyń aıtýynsha, 2027 jylǵa josparlanǵan nesıeni iske asyrýdyń ekinshi kezeńi aıasynda 25 joba júzege asyrylady. Bul jobalar 13 sý qoımasyn salý jáne 11 sý qoımany rekonstrýktsııalaýdy qamtıdy. Sonymen qatar, 10 oblysta (Almaty, Atyraý, Abaı, Shyǵys Qazaqstan, Jambyl, Jetisý, Batys Qazaqstan, Qyzylorda, Pavlodar jáne Túrkistan) ornalasqan 5000 shaqyrymnan astam ırrıgatsııalyq kanaldardy jańǵyrtý kózdelgen. Atalǵan jumystar nátıjesinde sý ınfraqurylymynyń jalpy jaǵdaıy aıtarlyqtaı jaqsarady. Budan bólek, 200 myńnan astam halqy bar 134 aýyldyq eldi mekende sý basý qaýpi edáýir tómendeıdi.
Budan buryn habarlanǵandaı, sýarmaly egistikterge sý tarıfterin belgileýdiń jańa ádistemesi ázirlenedi.