Stýdenttik ombýdsmen ınstıtýtyna qandaı shaǵym jıi túsedi
ASTANA. KAZINFORM – Stýdenttik ombýdsmen barlyq óńirde belsendi jumys istep jatyr. Bul týraly Ǵylym jáne joǵary bilim mınıstrliginiń Joǵary jáne joǵary oqý ornynan keıingi bilim komıteti tóraǵasynyń orynbasary Aqerke Abylaıhan aıtty.
Onyń atap ótýinshe, qazirgi tańda elimizdiń 122 joǵary oqý ornynda 680 myńǵa jýyq stýdent bilim alady. Mınıstrlik jastardyń quqyqtary men múddelerin qorǵaýǵa, oqý protsesindegi ádilettilik pen ashyqtyqty qamtamasyz etýge baǵyttalǵan keshendi jumys júrgizip keledi. Bul rette stýdenttik ombýdsmender ınstıtýtynyń orny erekshe. Stýdenttik ombýdsmender eki jyldan astam ýaqyt ishinde barlyq óńirde belsendi jumys istep jatyr.
– Akademııalyq adaldyqty saqtaý – bilim alýdaǵy basty prıntsıpterdiń biri. Bul rette Akademııalyq adaldyq lıgasy qurylǵan. Oǵan búginde 18 joǵary oqý orny múshe, - dedi Aqerke Abylaıhan Ortalyq kommýnıkatsııadar qyzmetindegi brıfıngide.
Al Ǵylym jáne joǵary bilim mınıstriniń jastar saıasaty jónindegi shtattan tys keńesshisi Toqtar Bolysov stýdenttik ombýdsmenderdiń 2024-2025 oqý jylyndaǵy qyzmetine toqtalyp, 6 079 ótinishtiń qaralǵanyn málimdedi. Olardyń deni oqý protsesi, jataqhana, shákirtaqy jáne uıymdastyrýshylyq máselelerge qatysty bolǵan.
– Ombýdsmender ınstıtýtynyń maqsaty – stýdentterdiń quqyqtary men zańdy múddelerin tıimdi qorǵaýdy qamtamasyz etý, sondaı-aq eldegi joǵary oqý oryndarynda qaýipsiz ári ádiletti bilim berý ortasyn qalyptastyrý. Jyl ishinde 100-den astam josparly is-shara men 20-dan astam jospardan tys monıtorıng júrgizildi. Ombýdsmender stýdentterdiń ótinishterine jedel áreket etip, týyndaǵan máselelerdi ýaqytyly sheshýge jáne qıyn jaǵdaıdaǵy stýdentterge qoldaý kórsetýge múmkindik berdi, - dedi ol.
2022 jyly ylym jáne joǵary bilim mınıstri Saıasat Nurbek stýdent quqyǵyn qorǵaıtyn ombýdsmen paıda bolatynyn aıtqan edi.