Stýdentterin jataqhanamen qamtymaǵan JOO-lar lıtsenzııadan aıyrylýy múmkin

AQTAÝ. QazAqparat – Jańa oqý jylynan bastap stýdentterin jataqhanamen qamtymaǵan ýnıversıtetter lıtsenzııadan aıyrylýy múmkin. Bul týraly Ǵylym jáne joǵary bilim mınıstri Saıasat Nurbek Aqtaýda jańa jataqhananyń ashylýy barysynda aıtty, dep habarlaıdy QazAqparat tilshisi.

Memleket basshysy Qasym-Jomart Toqaev 2022 jyly 1 qyrkúıek kúngi Joldaýynda jataqhana problemasyn sheshý úshin joǵary oqý oryndarymen jáne qurylys kompanııalarymen memlekettik-jekemenshik seriktestik ornatý tásilin barynsha engizýdi tapsyrǵan bolatyn. Sondaı-aq, «barlyq máseleniń sheshimin tabýdy memlekettiń moınyna ilý durys emes» dep sanaıtynyn aıtyp, «memleketten qarajat alý úshin jekemenshik joǵary oqý oryndarynyń jataqhanasy bolý shart» ekenin aıtty.

«Bul oraıda, Esenov ýnıversıteti mindetin tıisti deńgeıde oryndap otyr. Óıtkeni, bul jaqta jataqhana problemasy sheshilgen. Mine, búgin tórtinshi jataqhanasyn ashyp turmyz.

Jalpy, osy oraıda basa mán berip aıtqym keledi: Joǵary jáne joǵary oqý ornynan keıingi bilim uıymdary áleýmettik jaýapkershiligin eshqashan umytpaýy kerek! Budan bylaı bilim berý uıymdary jataqhanany qajet etetin barlyq bilim alýshylarynyń suranysyn qamtamasyz etýi mindetti. Sondyqtan, bıylǵy oqý jylynyń basy – 2023 jylǵy qyrkúıekten bastap, ýnıversıtetter óziniń qaladan tys barlyq bilim alýshylarynyń jataqhanalarda turýy úshin jaǵdaı jasaýdy qamtamasyz etpese, onda bul fakt bilim berý qyzmetine qoıylatyn biliktilik talaptaryna sáıkes kelmeýine baılanysty lıtsenzııany toqtata turýǵa nemese keri qaıtaryp alýǵa negiz bolady. Lıtsenzııany toqtata turý ne keri qaıtaryp alý ondaı bilim uıymdaryn bıýdjet qarajaty esebinen memlekettik tapsyrysyn ornalastyrý arqyly qarjylandyrýǵa kedergi keltiredi.

Stýdentterdiń, magıstranttar men doktoranttardyń jataqhanalardaǵy oryndarmen qamtamasyz etilýine memlekettik tapsyrysty ornalastyrý arqyly bilim berý salasynda kepildikter belgilengen. Memleket tarapynan qoldaý kórsetiletin stýdent jastardyń ómir súrý jaǵdaılaryn jaqsartýdaǵy bilim berý uıymdarynyń mańyzdy róli men jaýapkershiligi zańnamada anyq jazylǵan. Sondyqtan, zańnama normalaryn qatań saqtaý qajettigine nazar aýdaramyz», - dedi mınıstr jataqhananyń ashylý saltanatynda.

Esenov ýnıversıteti men «Aısar-Stroı» JShS konsortsıým quryp, jataqhana qurylysyn júrgizgen. Bes qabatty jańa jataqhana 3 adamdyq 1 bólme jáne 5 adamdyq 2 bólmelerden turady. Barlyǵynda jeke-jeke jýynatyn oryn men dárethanasy, tamaq daıyndaýǵa arnalǵan plıta, onyń ústinde bý men tútin sorǵysh qurylǵylar ornatylǵan. Nysan tehnıkalyq qaýipsizdik talaptaryna tolyq saı, munda órt qaýipsizdigi men sanıtarlyq normalar qatań saqtalady.

Jataqhananyń birinshi qabatynda demalatyn holl, ekinshi qabatynda býfet-bar qyzmet kórsetedi. Tórtinshi qabatta sabaqqa daıyndalatyn stýdentter úshin oqý zaly únemi ashyq turady. Al, besinshi qabattaǵy úlken jınalys zalynda jastar turaqty bas qosa alady.

Jertóle qabatynda trenajer zaly bolady, ǵımarat tóbesindegi tehnıkalyq qabaty túrli kommýnıkatsııalarǵa arnalǵan.

Sondaı-aq, jataqhana aldynda fýtbol alańy, avtokólik turaǵy, serýendeýge jáne demalýǵa arnalǵan oryndar da salynǵan.