Stýdentter shaǵymy – mınıstrlik «Astana» ýnıversıtetin tekserip jatyr
«Biz dıplomdyq jumysymyzdy jazyp bastadyq jáne jazda oqytýshymyzben baılanysý qajet boldy. Biraq, olardyń jumystan shyǵyp ketkenin estidik. Ýnıversıtetke habarlasyp, eshqaısysymen sóılese almadyq. Qyzdar basqa oqý ornyna aýysqysy kelgende, olardyń qujattaryn bermedi. Osylaısha, halyqaralyq qatynastar fakýletiniń 14 stýdenti Bilim jáne ǵylym mınıstrligine júgindik, qalǵan stýdentter qalaǵa endi kelip jatyr», - deıdi tórtinshi kýrs stýdenti Shyńǵys Kárimov tilshilerge bergen suhbatynda.
Stýdentter ótinishi negizinde Bilim jáne ǵylym mınıstrligi 6 sarapshydan turatyn tekserý tobyn qurǵan.
«Tamyzdyń aıaǵynda mınıstrlikke «Astana» ýnıversıtetiniń 14 stýdenti ótinish jazdy. Ýnıversıtette oqytýshy joq, ǵylymı jetekshilerdi jumystan bosatyp, olardyń ornyna basqa maman bermedi, dıplomdyq jumys taqyrybyn bekitpedik degen shaǵymdar tústi. Bitirgen stýdentter dıplomyn ala almaı júr, basqa JOO-ǵa aýysqysy kelse de, osy ýnıversıtetten qujattaryn ala almaǵan. Endi bizdiń mınıstrlik tarapynan 6 sarapshydan quralǵan komıssııa qurdy. Búgin jospardan tys tekserý júrgizýge kelip turmyz. Qazir 1,5 saǵattaı ýaqyt ótti, JOO rektory Almaty qalasyna biliktiligin arttyrý semınaryna ketti deıdi. Rektordyń orynbasarlary joq. Olardyń keıbiri aýyryp jatyr deıdi, keıbirin Kadr bóliminiń basshysy qaıda ekenin bilmeımin dep jaýap berdi. Zańnamaǵa saı, ýnıversıtet ókili qujattarmen tanysyp, aktimizge qol qoıýy kerek. Biz oǵan ótinishtiń mán-jaıyn aıtyp, tanystyrýymyz kerek. Zańgerdiń kelýin kútińizder dedi, kelgen zańger de tolyq aty-jónin aıtpady, qujatyn kórsetpedi. Qujatymyzdy kórsetý úshin biz onyń kim ekenin bilmeımiz. Ázirge 1,5 saǵat ótti, ýnıversıtettiń birde-bir ókili shyqqan joq», - dedi QR BǴM Bilim jáne ǵylym salasyndaǵy sapany qamtamasyz etý komıteti tóraǵasynyń orynbasary Ǵalymjan Jumashev.
Onyń aıtýynsha, osy aıdyń sońynda atalǵan ýnıversıtetti josparly tekserý belgilengen. Biraq, stýdentter shaǵym túsirgendikten, jospardan tys tekserý jasaýdy uıǵarǵan.
«Buǵan deıin mınıstrlik tarapynan birneshe tekserý bolǵan. Bıyl aqpan aıyndaǵy josparly tekserýde ýnıversıtet tekserý jumystaryna kedergi jasaǵan edi. Bizdiń ókilderimiz hattama toltyryp, sotqa jiberdi. Sot ýnıversıtetke 100 AEK ákimshilik aıyppul salǵan. Dál osyndaı jaǵdaı byltyr da bolǵan. Búgingi tekserý boıynsha da, JOO basshysy ótinishte kórsetilgen máselelerdiń negizsiz dáleldeýi qajet. Dáleldenbegen jaǵdaıda, ótinishte aıtylǵan faktiler rastalsa, BǴM hattama toltyryp, taǵy da ákimshilik jaza – aıyppul salynady. Odan keıin JOO lıtsenzııasy ýaqytsha toqtatylady. Mınıstrlik quzyretinde lıtsenzııany 1-6 aıǵa deıin ýaqytsha toqtatýǵa bolady. Sol kórsetilgen merzimde bul ýnıversıtet eskertýlerdi joıýy tıis. Joıylmaǵan jaǵdaıda JOO lıtsenzııasyn keri qaıtarý sharasy qaralady. Qazirgi ýaqytta bizdiń mindetimiz – lıtsenzııany qaıtaryp alý emes, stýdentterdiń shaǵymyn tekserý, komıssııanyń basty jumysy osy», - dep túsindirdi Ǵalymjan Jumashev.
Óz kezeginde stýdentter shaǵymyna «Astana» ýnıversıteti Qabyldaý komıssııasy jaýapty hatshysynyń orynbasary Almas Halılov jaýap berdi.
«Pandemııaǵa baılanysty, ýnıversıtet akkredıtatsııadan kesh ótti. 11-13 tamyz aralyǵynda akkredıtatsııadan ótip, 28 tamyzdan bastap bıyl bitirgen stýdentter dıplomyn alyp jatyr. 10 qyrkúıekten bastap, oqý jyly tolyǵymen bastalady. Qazir pandemııaǵa baılanysty kóp oqytýshy aýyrdy, ókinishke qaraı bir oqytýshy qaıtys boldy. Sol sebepti, muǵalimder aýrýdan jazylyp, 10 qyrkúıekten bastap, jumysyna kirisedi. Ýnıversıtet saıtynda barlyq telefon kórsetilgen, tur, stýdentter soǵan habarlasa alady. Oqý bólimi transkrıpt bermeı jatyr degen shaǵym boldy, akademııalyq kúntizbege sáıkes ár stýdent 25 tamyzǵa deıin basqa oqý ornyna aýysa alady. Shaǵym týraly qazir ǵana bilip turmyz, zańgerimiz qujattardy qarap, jazbasha túrde jaýap beredi», - dep jaýap berdi A. Halılov.
