Stýdentter qarjylyq saýattylyǵyn arttyryp, ınternet alaıaqtyqtan qorǵanýdy úırenedi

ASTANA. QazAqparat – Qazaqstandyq ýnıversıtetter qabyrǵasynda stýdentterdiń qarjylyq saýattylyǵyn arttyrý jáne ınternet alaıaqtyqtan saq bolýǵa úıretetin kýrstar paıda bolady. Bul týraly Ǵylym jáne joǵary bilim mınıstri Saıasat Nurbek málim etti, dep habarlaıdy QazAqparat tilshisi.

«Halyqtyń qarjylyq saýattylyǵyn arttyrý boıynsha aýqymdy is kútip tur. Osy oraıda, Mastercard kompanııasymen birlesip joǵary oqý oryndarynda qarjylyq saýattylyqty arttyrýdy qolǵa almaqpyz. Saýattylyqty kóterýdi tek stýdenttter arasynda ǵana emes, barsha halyq úshin keńinen uıymdastyrý kerek. Qarjy tehnologııalarynyń múmkindikteri keńeıip keledi. Sáıkestendirý, qaýipsizdikti qamtamasyz etý, qarjylyq tranzaktsııa jáne derbes derekterin qorǵaý salasynda aıtýly syn-tegeýrinder bar. Osy oraıda, bizdiń jastar eń úzdik kýrstarǵa qatysýǵa múmkindik alady», - dedi Saıasat Nurbek elordada ótken elektrondyq kommertsııa mektebiniń jumys qorytyndysyna arnalǵan shara barysynda.

Mınıstr qarjylyq saýattylyqtyń taıazdyǵy keı kezde qaıǵyly jaǵdaıǵa dýshar etetinine de toqtaldy.

«Ókinishke qaraı, qumar jáne onlaın oıyndarǵa úıir, utys tigetin jáne onlaın kredıt alatyn azamattardyń sany azaımaı tur. Ásirese, jastar arasynda. Keıbir jaǵdaıda qarjylyq saýattylyǵy taıaz azamattar atalǵan uıymdardyń aldaýyna túsip qalyp jatady. Nátıjesinde tyǵyryqtan shyǵý jolyn tappaǵan jastar sýıtsıdke qadam basady», - deıdi ol.

Jıyn barysynda Ǵylym jáne joǵary bilim mınıstri Saıasat Nurbek pen Ortalyq Azııadaǵy Mastercard kompanııasynyń bas dırektory Rafal Trepka ekijaqty memorandýmǵa qol qoıdy.

Buǵan deıin habarlaǵanymyzdaı, bıyl eldegi 70 ýnıversıtet bazasynda «Kúmis ýnıversıtet» ortalyǵy ashylmaq.