Stýdent sabaqty boldyrmaý úshin jarylǵysh qurylǵylar týraly jalǵan habarlamalar jibergen
«Terrorızm aktisi týraly kórineý jalǵan habarlaý» sııaqty qylmystyq áreket – qoǵamdyq tártipke qol suǵatyn asa qaýipti qylmystardyń biri. Bul qylmystyń qaýiptiligi mynada: azamattar arasynda dúrbeleń men qorqynysh paıda bolady, mekemelerdiń, uıymdardyń, kásiporyndardyń, kommertsııalyq qurylymdardyń qyzmeti toqtatylady.
Mundaı habarlama túskende shuǵyl qyzmetter oqıǵa ornyna jetip, azamattardy evakýatsııalap, jarylǵysh qurylǵylardy izdeıdi. Barlyq jaǵdaıda aqparat rastalmaıdy deýge bolady.
– Almatyda ekstremızmge qarsy is-qımyl bólimshesiniń qyzmetkerlerimen Júrgenov atyndaǵy Óner akademııasy kolledjiniń kámeletke tolmaǵan stýdenti anyqtalyp, ustaldy. Ol oqý ornynda jarylǵysh qurylǵy jasyrylǵany týraly birneshe ret jalǵan habarlama jasady dep kúdiktelýde. Anyqtalǵandaı, ol 27, 28 aqpanda jáne 2 naýryzda tańǵy ýaqytta kolledjdiń qyzmettik elektrondyq poshtasyna elektrondyq mekenjaıyn aýystyrý baǵdarlamasyn qoldana otyryp, tórt ret habarlama jibergen. Ustalǵannan keıin jáne alynǵan dáleldemelerdi usynǵannan keıin ol oqýda úlgermeýine baılanysty oqý protsesin toqtatý úshin osy qylmystardy jasaǵanyn moıyndady.
Bul fakt Qazaqstan Respýblıkasy Qylmystyq kodeksiniń 273-baby boıynsha tirkeldi. ІІM terrorızm aktisi týraly kórineý jalǵan habarlaǵany úshin bes jylǵa deıingi merzimge bas bostandyǵynan aıyrý jazasy qarastyrylǵanyn eskertedi.
«Búgingi tańda quqyq qorǵaý organdarynda mundaı qylmystarmen kúresý úshin barlyq múmkindikter bar jáne zamanaýı tehnıkalyq quraldar qoldanylady. Mundaı qylmystardyń basym kópshiligi kezekshi táýlikte ashylady», – dedi ІІM ekstremızmge qarsy is-qımyl departamenti bastyǵynyń orynbasary Darhan Razýev.
Bul qylmys úshin 14 jastan bastap qylmystyq jaýapkershilik kózdelgen. Sonymen qatar sot sheshimi negizinde shyǵyndar men osyndaı habarlamadan keltirilgen barlyq zalal ótelýi tıis.
Eger mundaı áreketterdi kámeletke tolmaǵandar jasaǵan jaǵdaıda zalaldy óteý olardyń ata-analaryna nemese zańdy ókilderine júkteledi. Barlyq kúshterdiń bir shyǵýynyń ózine 200-den 300 myń teńgege deıin jumsalady, al kásiporyndar men saýda obektileriniń toqtap qalýynan keltirilgen zalal mıllıondaǵan teńgemen eseptelýi múmkin.
Máselen, qylmystyq isterdi tergeý barysynda memleketke osyndaı jalǵan habarlamalarmen keltirilgen materıaldyq shyǵyn jyl saıyn 500 myńnan 2 mln teńgege deıin ekeni anyqtaldy.
