Strategııalyq baǵdarlamalar nege uzaq oryndalady – Oljas Qudaıbergenov

ASTANA. QazAqparat – «Jibek Joly» telearnasyndaǵy jýrnalıst Erbolat Muhamedjannyń «JJ Talk» baǵdarlamasyna suhbat bergen ekonomıst Oljas Qudaıbergenov elimizdiń ekonomıkalyq josparlaý júıesindegi kemshilikterdi atady, dep habarlaıdy QazAqparat tilshisi.

«Jańa ekonomıkalyq saıasattyń ári qaraı qalaı oryndalatynyn endi kóremiz. Ol negizi qansha aqsha bólinetini jáne qandaı quraldardy qoldanatynyna baılanysty. Biraq bizdiń josparlaý júıemizde bir úlken másele bar. Mysaly úlken bir strategııalyq baǵdarlama qabyldanǵan kezde ol 5 jylǵa josparlanady. Biraq strategııa qabyldanǵan kezde ol aqshasyz qabyldanady. Sosyn aqsha tabýǵa 1-2 jyl ketedi. Qazir bul júıeni birshama ózgertti. Qazir ulttyq jobalar aldymen aqsha bólinip, keıin qabyldanady. Degenmen bunyń ózinde bizdiń bıýdjette kóptegen protsedýra bar. Eger bastama qolǵa alynǵannan bastap alsaq, sol protsedýralardy jasap, aqsha bólingenge deıin 1-1,5 jyl ketedi. Ol óte uzaq merzim. Mysaly damyǵan memleketterde árbir memlekettik organnyń óziniń avtonomııasy bar. Olarda qosymsha kelisim protsedýrasy joq. Olar jobany 2-3 aıda qarjylandyryp úlgeredi», - dedi Oljas Qudaıbergenov.

Eske salaıyq, búgin «Jibek Joly» telearnasyndaǵy «JJ Talk» baǵdarlamasynda Qazaqstannyń jańa ekonomıkalyq saıasaty taqyryby talqylanǵan bolatyn. Onda suhbat bergen Ulttyq ekonomıka mınıstri Álibek Qýantyrov jańa ekonomıkalyq saıasattyń basym baǵyttaryna toqtaldy.

Aıtýynsha, aldaǵy ýaqytta shaǵyn jáne orta bıznes pen aýyldardy damytý basty nazarda bolmaq.

Budan ózge, mınıstr keler jyldyń ekinshi jartyjyldyǵynan bastap tarıfterdiń baǵasy ósetinin málim etti.