Strandja kýbogi – 2025: Úsh qyzymyz jeńip, bireýi jeńildi
ASTANA. KAZINFORM — Bolgarııa astanasy Sofııada ótip jatqan dástúrli Strandja halyqaralyq týrnıriniń ekinshi kúni tórt qazaqstandyq burymdy boksshymyz sharshy alańǵa shyǵyp, úsheýi jeńiske jetse, bireýi jarys jolynan shyǵyp qaldy.
Naqtyraq aıtsaq, búgingi «Strandja» týrnırin kúndizgi sessııada boksshy qyzdar bastady. Ulttyq qurama sapynda sharshy alańǵa shyqqan 4 boksshy qyzymyzdyń úsheýi alǵashqy jekpe-jekterin jeńispen bastap, jarysty ary qaraı jalǵastyrýǵa múmkindik aldy.
50 kelige deıingi salmaqta Gúlnar Turapbaı aǵylshyn Oaklı Kelsıdi aıqyn basymdylyqpen utsa, odan keıin sharshy alańǵa kóterilgen Aıdana Jabynbekova (-57 kg) horvat qyzyn 4:1 esebimen oısyrata utty.
Al 63 kelige deıingi salmaqta Arýjan Jańabaeva da qarsylasyna myqtylyǵyn moıyndatty. Ol 1/8 fınalda vengrııalyq Dıana Chıframen kezdesti. Qazaqstandyq boksshy qarsylasyn 5:0 esebimen taza jeńdi, onyń ústine úshinshi raýndta vengrııalyqty nokdaýnǵa túsirgenin de aıta keteıik.
Endi erteń ótetin 1/4 fınalda Arýjan túrkııalyq Polat Berfınmen judyryqtasady.
Al 75 kelidegi Anastasııa Baıazıtova qytaılyq Shıan Lımen judyryqtasyp, tóreshilerdiń ortaq sheshimimen jeńilip qaldy.
Esterińizge sala keteıik, osyǵan deıin alǵashqy jarys kúni qazaqstandyq boksshylar qandaı nátıjege qol jetkizgenin jazǵan bolatynbyz.