«STOP trafık»: Adam saýdasyna baılanysty 47 qylmys anyqtaldy
«Adam saýdasy jáne onymen teń keletin eńbekti qanaý – adam quqyǵyn buzatyn ózekti problema. Bul másele álem elderinde ǵana emes, Qazaqstanda da alańdaýshylyq týdyrady. ІІM osy baǵyt boıynsha júıeli jumys júrgizýde. Atap aıtqanda, májbúrli eńbekti anyqtaý úshin sharýa, fermer qojalyqtary, qurylys obektileri, jynystyq paıdalaný faktileriniń jolyn kesý úshin monsha keshenderi men qonaq úıler tekserilip, ınternet jelisi de baqylanady», - dedi ol mınıstrliktiń baspasóz qyzmeti alańynda ótken brıfıngte.
Resmı ókildiń aıtýynsha, el aýmaǵynda ishki ister organdarynyń uıymdasqan qylmysqa qarsy kúres bólimsheleri ótken aptada «STOP trafık» jedel aldyn alý is-sharasyn ótkizdi.
«Operatsııanyń 3 kúninde polıtseıler adam saýdasyna baılanysty 47 qylmysty anyqtady. Onyń ishinde – jumysqa jegý maqsatynda zańsyz bas bostandyǵynan aıyrýdyń 3 faktisi, 10 adam saýdasy, onyń ishinde 5-ýi kámeletke tolmaǵandar, 7 jezókshelikpen aınalysýǵa tartý faktisi, onyń 3-i kámeletke tolmaǵandarǵa qatysty jáne 27 prıton ustaý men jeńgetaılyq faktileri. Jezókshelikpen aınalysýǵa úı-jaılar bergeni jáne jeńgetaılyq úshin 30 ákimshilik quqyq buzýshylyq jáne qoǵamdyq oryndarda tıisý faktisi boıynsha 453 quqyq buzýshylyq tirkeldi», - dedi Shuǵyla Turlybek.
Onyń dereginshe, Almaty oblysynda kámeletke tolmaǵandardy saýdalaý faktisi anyqtaldy. Oblystyń 39 jastaǵy turǵyny óziniń jańa týǵan ulyn satyp jibergeni belgili boldy. Bul derek 2021 jyldyń jeltoqsanynda oryn alǵan. Áıel balasyn erli-zaıypty jupqa zańsyz asyrap alý maqsatynda jarty mıllıon teńgege satqan.
«Qaraǵandy oblysynda eńbekke eriksiz jegý faktisi anyqtaldy. Sharýa qojalyǵynyń basshysy birneshe jyl boıy zorlyq-zombylyqpen, sondaı-aq ózine qaryz ekenin paıdalanyp, 52 jáne 30 jastaǵy eki turǵyndy jumysqa salǵan. Er adamdar úı sharýashylyǵymen, tehnıkany jóndeýmen jáne mal kútimimen aınalysýǵa májbúr bolǵan. Qashýǵa tyrysqanda olar qojalyqqa qaıta qaıtarylyp, jazalanyp otyrǵan. Sharýa qojalyǵyna jaqyn trassa 65 shaqyrym jerde ornalasqan. Qazirgi ýaqytta eńbekke eriksiz jegý maqsatynda zańsyz bas bostandyǵynan aıyrǵany úshin qylmystyq is qozǵaldy, tergeý júrgizilýde. Jábirlenýshilerge qajetti kómek kórsetilýde. Qostanaı oblysynda 38 jastaǵy qala turǵyny ustaldy, ol bir aı boıy aldaý jáne bopsalaý jolymen kolledjde oqıtyn qyzdy jezókshelikpen aınalysýǵa tartyp, ony jaldamaly páterlerde klıenttermen jolyqtyryp otyrǵan. Jábirlenýshi týystaryna tapsyryldy. Qylmystyq kodekstiń 134-shi «Kámeletke tolmaǵandy jezókshelikpen aınalysýǵa tartý» baby boıynsha qylmystyq is qozǵaldy»,- dedi resmı ókil.
