Stepnogor soty Bıshimbaevtyń inisine raqymshylyq jasady
ASTANA. KAZINFORM — Burynǵy Ulttyq ekonomıka mınıstri Qýandyq Bıshimbaevtyń azamattyq nekedegi jary Saltanat Núkenovanyń ólimine qatysty sottalǵan Baqytjan Baıjanov Stepnogor sotynyń úkimi boıynsha raqymshylyqqa ilindi.
— Stepnogor qalalyq soty Qylmystyq atqarý júıesiniń mekemesinen sottalǵan B-nyń jaza merzimin «Konstıtýtsııasynyń otyz jyldyǵyna baılanysty raqymshylyq jasaý týraly» zańdy qoldana otyryp qysqartý týraly túsken usynymdy qarady.
Sot B-nyń 2024 jyldyń 13 mamyrynda Aýdanaralyq mamandandyrylǵan qylmystyq sottyń úkimimen Qylmystyq kodekstiń 432-baby boıynsha 4 jylǵa bas bostandyǵynan aıyrylǵanyn anyqtady. Sot sottalǵan azamatqa qatysty usynymdy mynandaı negizderge súıene otyryp qaǵanattandyrdy.
Qylmystyq kodekstiń 78-babynyń 2 bóligine sáıkes, aýyr jáne asa aýyr qylmys jasaǵany úshin taǵaıyndalǵan jaza merzimin qysqartýǵa bolady.
Konstıtýtsııasynyń otyz jyldyǵyna baılanysty raqymshylyq jasaý týraly» zań boıynsha negizgi jazanyń nemese ótelmegen bóliktiń merzimi shyǵyn ótelgen jaǵdaıda nemese shyǵyn keltirilmegen jaǵdaıda úshten bir bóligine deıin qysqartylady.
Sot úkimimen B-dan óndirip alynýy kerek bolǵan májbúrli tólemder men protsessýaldyq shyǵyndar tolyq kólemde óteldi.
Sot qaýlysy Qylmystyq atqarý júıesi mekemesiniń sottalǵan B-nyń jaza merzimin qysqartý týraly usynymyn qanaǵattandyrdy, — dep jazylǵan qalalyq sot taratqan resmı málimette.
Osylaısha sot Baqytjan Baıjanovtyń endi óteıtin jaza merzimin 1 jyl 4 aı 17 kún dep belgiledi.
Sot aktisi kúshine engen joq.
Aıta ketelik Baqytjan Baıjanov raqymshylyqqa ótinish bergen edi.
Buǵan deıin 24 jylǵa qamalǵan eks-sheneýnik Qýandyq Bıshimbaevqa túrmede áli jumys tabylmaǵanyn jazǵan edik.