Statıstıkany nólden bastap qaıta túzý múmkin be – vıtse-premerdiń jaýaby

ASTANA. KAZINFORM – Premer-Mınıstrdiń orynbasary – Ulttyq ekonomıka mınıstri Nurlan Baıbazarov eldegi resmı statıstıkany qaıta túzý týraly usynystarǵa jaýap berdi.

«Keıbir sarapshylar jańa ekonomıkalyq baǵdarǵa túsý úshin resmı statıstıkany nólden bastaý kerek degen paıym aıtady. Bul baǵyttaǵy ustanymyńyz qandaı? Resmı statıstıkany nólden bastap qaıta túzýge kúsh salasyzdar ma?» - dep surady jýrnalıst.

Nurlan Baıbazarov mundaı máseleni Aýyl sharýashylyǵy mınıstri de kótergenin málim etti.

«Ustanym degende, árıne, bizge obektıvti derek kózderi kerek. Bizdiń ekonomıkanyń barlyq esebi, jalpy ishki ónimniń esebi sol statıstıkalyq derekterden qurylady. Sondyqtan bul biz úshin ózekti másele. Bul salada jumys júrgizilip jatyr. Prezıdent Ákimshiligi janynda arnaıy bıýro bar ekenin bilesizder. Olar da qazir jumys istep jatyr. Aýyl sharýashylyǵy mınıstri de aıtyp ótken bolatyn. Bul jerde artyq jazý tendentsııasymen belsendi túrde kúres júrgiziletin bolady. Óıtkeni, biz jalǵan derektermen jalpy ishki ónimdi kótere almaımyz», - dedi vıtse-premer.

Jýrnalıst qandaı da bir statıstıkany nólden bastap túzý josparda bar ma?» - dep naqtylady.

«Joq, nólden bastaý emes. Bul jerde statıstıkanyń naqtylyǵyn, derek kózderiniń naqtylyǵyn durystap qaraý kerek. Onyń óz metodıkasy bar», - dedi mınıstr.