Starlink Qazaqstanda resmı túrde iske qosyldy

ASTANA. KAZINFORM – 13 tamyzdan bastap Starlink kompanııasy Qazaqstan aýmaǵynda resmı túrde spýtnıktik ınternet qyzmetin usyna bastady.

QR Tsıfrlyq damý, ınnovatsııalar jáne aeroǵarysh ónerkásibi mınıstrliginiń málimetinshe, endi elimizdiń turǵyndary SpaceX kompanııasyna tıesili tómen orbıtalyq spýtnıkter jelisi arqyly joǵary jyldamdyqty jáne senimdi ınternetke qosyla alady.

Eske sala ketsek, 2025 jylǵy 12 maýsymda QR Tsıfrlyq damý, ınnovatsııalar jáne aeroǵarysh ónerkásibi mınıstrligi men Starlink kompanııasy qyzmet kórsetý kezinde Qazaqstan zańnamasyn saqtaýdy mindetteıtin kelisimge qol qoıǵan bolatyn.

Starlink tehnologııasy shalǵaı jáne qoljetimdik tómen óńirlerde de turaqty qosylymdy qamtamasyz etip, halyqqa zamanaýı tsıfrlyq servısterdi paıdalanýǵa múmkindik beredi.

Negizgi tarıfter, qosylý sharttary jáne qosymsha aqparat SpaceX kompanııasynyń resmı saıtynda qoljetimdi.