Sportshy, zańger, munaıshy: Eriktiler sý tasqynynda qalaı eńbek etti
ASTANA. KAZINFORM – Eldegi sý tasqynyna qarsy is-sharalarda 50 myńnan astam volonter eńbek etip keledi. Olar turǵyndardy evakýatsııalaýǵa atsalysyp, gýmanıtarlyq kómekti jınap suryptaıdy, aryq qazyp, bógetterdi kúsheıtedi. Birlik kúnine oraı, agenttik tilshileri túrli óńirde jumys istegen volonterlar oqıǵasyn usynady.
Sambodan Azııa jáne Álem chempıony, 30 jastaǵy Nurbol Serikov Oral qalasynda jattyǵýshy bolyp jumys isteıdi jáne kásibı sportpen aınalysady. Ol sý tasqyny bastalǵaly eriktiler qatarynan tabyldy. Oǵan qosa, 15 sáýirde Semeıde ótken el birinshiliginde júldeli birinshi oryn alyp úlgerdi jáne qaıtadan volonterlikke oraldy.
«Árıne, el basyna kún týǵanda er jigittiń qarap jatýy jaramaıdy. Tutas qalany sý basý qaýpi tóngende jattyǵýym bar edi dep qalaı aıtasyń? Osylaısha, sporttaǵy áriptesterim men dostarymdy jınap, arnaıy kómek tobyn qurdyq jáne qaı jer kómekke muqtaj bolsa, sonda baryp, qol ushyn berdik. Bar qolymyzdan kelgeni qum salyp, qap tasý, gýmanıtarlyq kómekti taratý boldy. Ata-anamnyń úıine sý jaqyndaǵandyqtan, olardy da qaýipsiz jerge kóshirý qajet boldy», - dedi sportshy agenttikke bergen suhbatynda.
Kelesi aıda Makao qalasynda sambodan Azııa chempıonaty ótedi jáne qarasha aıynda Astanada álem birinshiligi bolady. Nurbol sol jarystarǵa daıyndalyp júr.
«Semeıdegi jarys ta óte mańyzdy edi. Óıtkeni jyl saıyn Ulttyq qurama sapynda óz nátıjemizdi rastap, bekitip otyrýymyz kerek. Bir jyldyq eńbegimiz synalatyn, jaýapkershilikke toly sát deýge de bolady. Onsyz jarystarǵa barý qıyn. Nátıjesinde jarys oıdaǵydaı ótti, birinshi oryn aldym. Kelgende de sý basý qaýpi seıilgen joq, qaıtadan bóget jasaý jumystaryna kiristik. Oǵan qosa, gýmanıtarlyq kómekter legin túsirip, evakýatsııa ornyndaǵy turǵyndarǵa taratamyz», - deıdi N. Serikov.
Onyń aıtýynsha, Oral qalasyna kómekke kóptegen eriktiler keldi. Halyqtyń aýyzbirshiligi de osyndaıda kórindi.
«Qutqarýshylar, polıtseıder, ákimdik, eriktiler, blogerler, ánshiler, bári jumyla iske kiristi. Bárimizdiń maqsatymyz – qalany qutqarý boldy. Ásirese Zarechnyı, Venera, Zachagansk sekildi saıajaı aýmaqtarynda jaǵdaı qıyn edi. Qansha bóget salynsa da, sýdyń aǵysy shaıyp ketti. Qutqarýshylar kúndiz-túni motorly qaıyqpen turǵyndardy alyp shyǵatyn. Jastar aýysymmen jumys istedi. Qum túsiretin kólik júrgizýshileri úıine barmaı, rýlinde uıyqtaıtyn. Rasynda da elimizdiń birligin, birtutastyǵyn kórip súısindik», - deıdi sportshy.
Petropavl turǵyny Evgenıı Solovev 21 jasta. Ol M. Qozybaev atyndaǵy Soltústik Qazaqstan ýnıversıtetiniń 4-kýrs stýdenti jáne 8 jyldan beri volonterlikpen aınalysady. Bolashaq zańger tutynýshylar quqyǵyn qorǵaý boıynsha konsýltatsııalar beredi.
«Bizde táýlik boıy jumys isteıtin volonterlik pýnkt bar – 956 adam gýmanıtarlyq kómek tasýmen, adamdardy qutqarýmen aınalysyp jatyr. Bastapqyda TJD mamandarymen birge sý basqan Podgora aýdanyn evakýatsııalaýǵa qatystyq, onda bóget jasaýǵa tyrystyq, alaıda bul bógetter adamdardyń evakýatsııalanyp úlgerýine ǵana kómegin tıgizdi. Árıne jergilikti halyq az ýaqytta belýardan keletin sý bolaryna senbedi. Sýdyń da aǵysy qatty boldy. Adamdardy qutqarǵan soń, jan-janýarǵa kiristik. Baılaýly kúıde qalǵan ıtter, mal-múlikterge jol ashtyq», - dedi E. Solovev.
Keıinirek Petropavlda volonterlerdiń aǵysy qatty muzdaı sýǵa túsýi qaýipti dep tanylyp, tyıym salynǵan. Sonda Evgenıı bastaǵan volonterlik top qala mańyndaǵy Bolshaıa malyshka, Presnovka, Sokolovka, Vagýlın aýyldaryna baryp, turǵyndarǵa barynsha kómektesken.
«Muzdaı sýdan aýyrǵan kezderimiz boldy, volonter dárigerler bizdi emdedi. Qazir kóp ýaqytymyz gýmanıtarlyq júkterdi túsirýge, turǵyndarǵa taza aýyz sý taratýǵa bólinedi. 22 sáýirde sý tasqyny qaýpi shegine jetkende, úıge baratyn ýaqytymyz bolmady. Óıtkeni tańǵy 4-ten bastap, jańa júk kóligin qabyldap, baspanasyz qalǵan jandarǵa azyq-túlik taratamyz. Volonterlik – halqymyzǵa tán qasıet. Tipti sý tasqynynan zardap shekken adamdardyń ózi basqalarǵa kómektesýge umtylyp turady. Endi olarǵa quqyqtyq kómek kórsetý jolyn qarastyryp jatyrmyz. Ótemaqy alý joldaryn túsindiretin usynymdar ázirleımiz», - deıdi volonter.
Sonymen birge, sý basqan eldi mekenderge jekelegen shet el azamattary da qol ushyn sozdy.
Sondaı azamattardyń biri — AQSh-tyń ońtústik Lýızıana shtatynan kelgen maman Djon Fell. Ol jergilikti munaı kompanııasynda jumys isteıdi jáne 60-qa jýyq áriptesimen birge jergilikti turǵyndarǵa kómek kórsetip, kópshiliktiń ortasynan tabyldy.
«Bizdiń Lýızıana shtatynda jylyna 3-4 ret sý tasıdy. Sondyqtan tasqynmen kúreste biraz tájirıbem bar. Bar biletinimdi Jaıyq jaǵasyn bekitýde paıdalanyp jatyrmyn. Atyraý meniń ekinshi úıim bolyp ketti. Otbasym da osynda. Osy jerdegi jumysty aıaqtap bolǵan soń, turǵyn jaıymdy qorǵaýǵa baramyn», — dedi D. Fell.
Daǵystandyq Omarashab Ahmedov ta eldiń yqylasyna bólendi. Ol túngi saǵat 2-de dosynyń qoımasynda saqtalǵan 50 myń qapshyqty júk kóligine tıep, Astrahan asyp, Atyraýǵa kelip, turǵyndarmen birge bóget jasaýǵa kómektesti.
Aıta keteıik, búgingi tańda el boıynsha volonterler 10 myń tonnaǵa jýyq gýmanıtarlyq kómek jınady, onyń 6326 tonnasy sý tasqynynan erekshe zardap shekken aımaqtarǵa jetkizildi jáne taratyldy.
