SpaceX orbıtaǵa krematsııalanǵan adamdardyń kúli salynǵan jerserik ushyrady

ASTANA. QazAqparat - SpaceX ádette orbıtaǵa kommýnıkatsııalyq jer serikteri men HǴA jabdyqtaryn jetkizýmen aınalysady. Biraq bıyl Falcon 9 zymyrany erekshe tapsyrmany oryndaıdy: ol arqyly ǵaryshqa 300 marqumnyń súıeginiń kúli bar jerserigi ushyrylady. Bul týraly ǵaryshta erekshe jerleý qyzmet túrin kórsetetin Elysium Space kompanııasy habarlady.

Qaıtys bolǵan adamnyń otbasy 2 490 dollarǵa shaǵyn jer seriginde syıymdylyǵy 1 lıtrge deıingi jáne salmaǵy 1,33 keliden aspaıtyn 300 jáshiktiń birinen oryndy brondaı alady. Keıinirek Falcon 9 atalmysh shaǵyn jerserikti orbıtaǵa jetkizedi jáne ol eki jyl boıy Jerdi aınalyp júredi. Marqumnyń týystary tabyttyń ushý baǵytyn smartfondaǵy arnaıy qosymsha arqyly naqty ýaqyt boıynsha baqylaı alady. Jerserik óziniń tapsyrmasynyń sońynda tómendep, atmosferaǵa kiredi jáne ádemi bolyp janyp ketedi.

Jerserikte ázirge 100 oryn brondalǵan. Onyń tutynýshylary mıllıarderler emes, túrli soǵys ardagerleri, ǵarysh yntagerleri jáne t.b. Elysium Space bolashaqta 9 950 dollarǵa máıittiń bir shymshym  topyraǵyn Aıǵa alyp barýdy josparlaýda.

NASA eń alǵashqy ǵaryshta jerleý rásimin 1992 jyly ótkizgen bolatyn. 1997 jyly krematsııalanǵan 24 adamnyń kúli Pegas zymyrany arqyly aspanǵa ushyrylǵan edi. Olar aspanda 2002 jylǵa deıin júrip, atmosferaǵa qaıta kiretin kezde janyp ketken bolatyn.