SpaceX kommertsııalyq zymyrany alǵash ret muhıttaǵy tuǵyrǵa búlinbeı qondy

ASTANA. QazAqparat - SpaceX kompanııasynyń kóp ret paıdalanylatyn Falcon 9 kommertsııalyq zymyrany alǵash ret muhıttaǵy tuǵyrǵa búlinbeı qondy, dep habarlaıdy reseılik TASS agenttigi.

SpaceX kompanııasynyń basshysy  Ilon Mask Falcon 9 zymyranynyń birinshi bóligin 20 mártege deıin qaıtara qoldanýdy kózdep otyrǵandyǵyn málim etti.

Zymyran jeksenbi kúni portqa jetkizilgen soń, ony tehnıkalyq mamandar tekseredi.

Mask bolashaqta zymyran bólshekteri birshama jańǵyrtyla otyryp, 100 mártege deıin qaıtara qoldanýǵa bolatynyn málimdedi.

Eske sala ketsek, kompanııa zymyrannyń birinshi bóligin qaıtara paıdalaný kommertsııalyq ushyrylymnyń qunyn arzandatady dep sanaıdy. Buǵan deıin osyndaı zymyran jerge oralǵanda ony muhıttaǵy tuǵyrǵa qondyrý áreketi 4 márte sátsiz aıaqtalǵan bolatyn.