SpaceX álemdegi eń qymbat startapqa aınalýy múmkin
ASTANA. KAZINFORM — SpaceX álemdegi eń qymbat jekemenshik kompanııaǵa aınalyp, quny 800 mlrd dollarǵa deıin jetýi múmkin, dep habarlaıdy The Bell basylymy.
Ilon Masktiń SpaceX ǵarysh kompanııasy bir aktsııasyn 400 dollardan baǵalap, aktsııalardyń ekinshi rettik satylymyn bastady. Eger mámile sátti ótse, kompanııanyń quny 750-800 mlrd dollarǵa jetýi múmkin, bul SpaceX-ti álemdegi eń qymbat startapqa aınaldyrady. Qazirgi ýaqytta bul jetistik 500 mlrd dollarlyq qunymen OpenAI kompanııasyna tıesili.
Ótken shilde aıynda ótken aldyńǵy ekinshi rettik satylym kezinde kompanııa aktsııalary 212 dollar turǵan, al jalpy baǵasy shamamen 400 mlrd dollar bolǵan. WSJ derekterine sáıkes, SpaceX belsendi túrde damyp keledi: kompanııa zymyran salasynda kóshbasshy sanalady, al Starlink spýtnıktik servısiniń belsendi paıdalanýshylarynyń sany 8 mln-ǵa jetken.
Mámile jarty jyl saıyn ótetin tenderlik usynys aıasynda júzege asyrylyp jatyr. Osy kezde SpaceX-tiń shamamen 25 jyl boıy jeke kompanııa bolyp kele jatqanyna qaramastan qyzmetkerler men bastapqy ınvestorlar ózderiniń baǵaly qaǵazdaryn satyp, tabys ala alady.
The Information málimetinshe, kompanııa 2026 jyldyń ekinshi jartysynda IPO ótkizýdi josparlap otyr.
Eske sala ketsek, SpaceX kompanııasy Starship zymyranyn onynshy márte ushyryp, Úndi muhıtyna qonǵanyn jazdyq.
Al qyrkúıek aıynda qor naryǵynda aktsııalar men oblıgatsııalar belsendi óskenin habarlaǵanbyz.