Sozaqta sheneýnikter sábizdiń kelisin 16 myń teńgeden satyp alýdy josparlaǵan
TÚRKІSTAN. KAZINFORM – Túrkistan oblysyndaǵy jemqorlyqqa qarsy eriktiler 578,7 mln teńgeden astam bıýdjet qarajaty negizsiz jumsalýynyń aldyn aldy.
Oblystyq sanıtarlyq-epıdemıologııalyq baqylaý departamenti naryqtyq quny 15 myń teńge bolatyn bir tonna kómirdi 250 myń teńgeden satyp alýdy josparlaǵan. Eriktilerdiń aralasýynan keıin satyp alý jospary qaıta qaralyp, 30,2 mln teńge únemdeldi.
Al, Otyrar aýdany Qaraqońyr aýyldyq okrýginiń ákimdigi elektr energııasynyń 1 kVt-yn 580 teńgeden satyp almaq bolǵan. Bul iske de eriktiler áreket etip, bıýdjettiń 26,1 mln teńgesin únemdep qaldy.
Sozaq aýdanynyń bilim bólimi 1750 keli sábizdiń bir kelisin 16 786 teńgeden satyp alýdy josparlaǵan. Túrkistan oblysy boıynsha Sybaılas jemqorlyqqa qarsy qyzmetpen engizilgen usynymdardyń nátıjesinde 29,0 mln teńgeniń negizsiz jumsalýyna jol berilmedi.
«Túrkistan oblysynyń eriktileri «Sybaılas jemqorlyqqa qarsy volonterlik» jobasy bastalǵaly beri memlekettik satyp alý portalynyń monıtorıngileý barysynda 578,7 mln teńgeniń negizsiz jumsalýynyń aldyn aldy. Osy baǵyttaǵy jumys jalǵasýda, óńir turǵyndaryn sybaılas jemqorlyqqa qarsy eriktiler qataryna qosylýǵa jáne bıýdjet qarajatyn jumsaýdyń tıimdiligin birge baqylaýǵa shaqyramyz» - delingen Túrkistan oblysy boıynsha Sybaılas jemqorlyqqa qarsy qyzmeti usynǵan aqparatta.
