Sozaqta 38 ınvestıtsııalyq joba júzege asyrylyp, 3 myńǵa jýyq jumys orny ashylady
TÚRKІSTAN. KAZINFORM - Túrkistan oblysynyń ákimi Darhan Satybaldynyń tóraǵalyǵymen aýdan, qalalardyń damý jospary talqylanyp, bekitý jumystary jalǵasýda. Búgin Sozaq aýdanynyń ákimi Muhıt Turysbekov aımaqtyń 2024-2030 jyldarǵa arnalǵan áleýmettik-ekonomıkalyq damýy týraly baıandady.
Negizgi ındıkatorlar men ekonomıkany alǵa súıreıtin salalar saraptalyp, taldandy. Oblys ákimi tarapynan damý josparyn tolyqtyrý týraly tapsyrma berilip, sala basshylarynyń usynystary tyńdaldy.
«Bekitilgen damý josparyn oryndaý boıynsha Jol kartasy bekitilip, ol tııanaqty ári sapaly oryndalýy tıis. Sozaq aýdanynda óndiristi damytý mańyzdy. Taý-ken salasynda múmkindik mol. Týrızmdi damytýǵa da kúsh salǵan jón. Aýdan ákimdigi men basqarmalar birlese jumys atqarýy qajet», – dedi Darhan Satybaldy.
Aýdan ákiminiń aıtýynsha, Sozaq aýdany boıynsha 2024-2030 jyldarǵa jalpy quny 640 mlrd. 757 mln. teńgege 38 ınvestıtsııalyq jobany iske asyrý josparlanyp otyr. Ashylatyn jumys oryndary – 2 989. Salyqtyq túsimder 1 mlrd 987 mln. teńge bolady dep boljanyp otyr. Ónerkásip salasynda jalpy quny 636,2 mlrd. teńgege 15 joba júzege asyrylyp, 2 803 adam jumyspen qamtylady. Salyqtyq túsimder 1 mlrd. 850 mln. teńge bolady dep kútilýde. Agroónerkásip kesheni salasynda 19 joba júzege asady. Jalpy quny 3,7 mlrd. teńge, jumys orny – 151 adam. Týrızm salasynda jalpy quny 810 mln. teńge bolatyn 4 joba júzege asyrylyp, 35 jumys orny ashylady dep kútilip otyr. Barlyq salada jumys kúsheıtilip, naqty josparlar qoıylady.
Іske asyrylatyn ınvestıtsııalyq jobalardyń nátıjesinde jalpy óńirlik ónim kólemin jyl saıyn 6,8 paıyzǵa ósirý arqyly 6 jylda 1,5 esege arttyrý kózdelgen. Onyń ishinde ónerkásip salasy boıynsha 2030 jylǵa deıin jyl saıyn 6,5 paıyz ósim berip, 1,5 esege arttyrý, aýyl sharýashylyǵy salasy boıynsha jyl saıynǵy ósimdi 12,5 paıyzǵa, ıaǵnı 2 esege arttyrý josparlanyp otyr. Bul jospardyń oryndalýy oblys ákiminiń baqylaýynda bolady.
