Sottalǵandardy tasymaldaǵan vagon mýzeıge aınaldy
ASTANA. KAZINFORM – Ulttyq ulannyń Astana qalasynda ornalasqan 6636 áskerı bóliminiń qurylǵanyna 20 qańtarda 64 jyl toldy. Ataýly data qarsańynda áskerı bólim aýmaǵynda qamaýda otyrǵan adamdardy aıdaýyldaýǵa arnalǵan vagon ishindegi mýzeı ashyldy.
Ulttyq ulanynyń baspasóz qyzmetiniń málimetinshe, búginde mýzeıge aınalǵan vagon buryndary sottalǵandardy tasymaldaý kezinde qoldanylǵan. Al qazir onyń ishi quqyqtyq tártip áskeri atqaratyn jaýyngerlik qyzmet jaıyndaǵy aqparattar men estelikterge toly. Onda atalmysh qyzmetke qatysty jádigerler men maketter qoıylǵan.
– Búgin – bizdiń áskerı bólimniń qurylǵan kúni! Osy merekege baılanysty kontserttik baǵdarlama uıymdastyrdyq. Oǵan áskerı bólimniń jeke quramy jáne qurmetti qonaqtar men ardagerler arnaıy shaqyryldy. Biz búgin sarbazdar men sardarlarǵa áskerı bólimniń tereń tarıhynan syr shertip, merekelik kóńil kúı syılaımyz. Sondaı-aq is-sharaǵa aıdaýyldaý vagon murajaıynyń ashylýyn da qostyq, - dedi 6636 áskerı bóliminiń komandıri polkovnık Erlan Býranbaev.
Áskerı bólimniń qurylǵan kúnin atap ótý barysynda jańa mýzeı saltanatty túrde ashyldy. Dástúrli qyzyl lentany áskerı bólimniń komandıri polkovnık Erlan Býranbaev pen 13 jyl boıy aýdaýyldaý batalonynda qyzmet atqarǵan zapastaǵy polkovnık Amanjol Eleýqulov kesti. Osydan keıin Áskerı bólim kúnine arnaıy kelgen qonaqtar men ardagerler mýzeı ishin aralap kórdi.
– Men 22 jyl ǵumyrymdy osy áskerı bólimniń qabyrǵasynda ótkizippin. Búgin mýzeıge aınalǵan vagonǵa kirgende ózim qyzmet atqarǵan shaqtar eriksiz oıyma oraldy. Máselen, qabyrǵada ilingen kóne sýretter aıdaýyldaý qyzmetiniń qalyptasý kezeńderi jaıynda quńdy aqparat berip tur, - dedi zapastaǵy polkovnık Amanjol Eleýqulov.
Vagondaǵy mýzeıdiń 6636 áskerı bóliminde ashylýynyń ózińdik bir máni bar. Cebebi, 1961 jyly 20 qańtarda Tyń ólkeniń qurylýyna baılanysty Qazaq KSR Іshki ister mınıstriniń № 016 buıryǵymen Qazaq KSR ІІM ishki kúzetiniń 246 jasaǵy qurylyp, oǵan № 6636 berildi. Onyń quramyna Petropavl, Qostanaı, Pavlodar, Atbasar qalalarynda, Jolymbet kenishinde, Vıshnevka, Qusmuryn, Alekseevka kentterinde ornalasqan 10 komanda jáne 2 jeke top endi. Jasaq shtaby Tselınograd qalasynda ornalasty. Bólimniń jeke quramy qurylǵan sátten bastap eńbekpen túzeý kolonııalaryn kúzetý jónindegi mańyzdy mindetterdi oryndady, sottalǵandardy jáne sot protsesteri barysynda qamaýǵa alynǵan adamdardy, sondaı-aq avtomobıl jáne temirjol baǵyttary boıynsha Aqmola garnızonynyń áskerı sotynda aıdaýyldaýdy júzege asyrdy. Áskerı bólim osy bir mindetti shırek ǵasyrdan astam ýaqyt atqaryp keledi.
Osyndaı aıtýly kúnde Ulttyq ulan Án-bı ansambliniń solısteri men bıshileri áskerı bólimniń sahnasynda óz ónerlerin kórsetti. Qaraótkel aýyldyq okrýgynyń oqýshylarynan quralǵan «Serper» toby áskerı qyzmetshilerge kúıden shashý shashty.
Іs-sharada Astana qalasy Baıqońyr aýdany ákimdiginiń, Astana qalasynyń Qylmystyq atqarý júıesi departamentiniń, Astana qalasy boıynsha «Halyq banki» AQ-nyń jáne elordalyq brıgada 5573 áskerı bóliminiń ókilderi quttyqtaýlaryn jetkizip, syılyqtaryn tabys etti.
Aıta keteıik, budan bólek Otan aldyndaǵy qyzmetin abyroımen jáne belsendi atqaryp júrgen bir top áskerı qyzmetshiler men sarbazdar marapattaldy.
Eske salaıyq, qazirgi ýaqytta bólimniń jeke quramy Aqmola garnızony sottarynyń qaraýyldaryn qamtamasyz etý boıynsha qyzmet atqarady, sondaı-aq QR ІІM Ulttyq ulanynyń Bas qolbasshylyǵyn materıaldyq jáne qyzmettik qamtamasyz etýmen aınalysady.
Munda ár jarty jyl saıyn azamattar elimizdiń túkpir-túkpirinen áskerge shaqyrylyp, ant qabyldap, óz qyzmetin laıyqty atqarady.