Sot «Bolashaq» baǵdarlamasynyń túlekteriniń ústinen 21 is qozǵady
ASTANA. KAZINFORM – Búginde «Bolashaq» baǵdarlamasy aıasynda 12 474 qazaqstandyq shetelde bilim aldy. Onyń ishinde 9 846 túlek ózderiniń shartty mindettemelerin oryndady. Qalǵany mindetin ótep jatyr nemese belgili sebeptermen keıinge qaldyrǵan.
Baǵdarlamanyń iske asyrý barysyn «Halyqaralyq baǵdarlamalar ortalyǵy» AQ-ǵa saýal joldap suraǵan edik.
«2022 jyly 40 túlek, al 2023-2024 jyldary 66 túlek oqýdy aıaqtamaý, oqýǵa kirispeý jáne shetelde bolý sebepteri boıynsha stıpendııadan aıyryldy. Qazirgi ýaqytta olar qaryzyn qaıtarýda. 2024 jyly bıýdjetke aı saıyn 200 mln teńge qaıtarylyp jatyr. Al 2023 jyly 1,9 mıllıard teńge qaıtaryldy», - delingen agenttik joldaǵan saýal jaýabynda.
Boryshker bolashaq túlekteriniń máselesi sotqa deıin jáne medıatsııa tártibi arqyly sheshilip jatady.
«Kóp jaǵdaıda boryshkerler qarajatty óz erkimen qaıtarady. Mindettemelerdi oryndaýdan qasaqana jaltarǵan jaǵdaıda qaryzdy sot tártibimen óndirip alý júzege asyrylady. 2023-2024 jyldary 21 sot isi qozǵaldy», - deıdi ortalyqtan.
Qazir 1078 otandasymyz «Bolashaq» baǵdarlamasy boıynsha shetelde bilim alyp jatyr. Onyń ishinde 798 stıpendıat – magıstratýra baǵdarlamasy boıynsha, 144 stıpendıat – doktorantýra, 136 stıpendıat – taǵylymdamadan ótýde. Sondaı-aq, olarǵa bólinetin qarajat mólsheri ártúrli.
«Qarajat oqý baǵdarlamasyna, bilim alatyn elge jáne tańdalǵan mamandyqqa baılanysty bólinedi. Ýnıversıtettiń reıtıngi, onyń ornalasqan jeri, sondaı-aq baǵdarlamanyń uzaqtyǵy qarjyny esepteýde mańyzdy ról atqarady. Orta eseppen bir stıpendıatqa magıstratýra baǵdarlamasy boıynsha shamamen 10 mln teńge jumsalady. Al doktorantýra baǵdarlamasy boıynsha shamamen 20 mln teńge bólinedi, onyń ishinde oqý aqysy, stıpendııa, jol jáne basqa da shyǵyndar kiredi», - degen jaýap aldyq.
«Bolashaq» baǵdarlamasynyń stıpendıattary qandaı elderde oqyp jatyr:
AQSh pen Kanada - 55,3%;
Ulybrıtanııa men Irlandııa – 31,6%;
Eýropa elderi – 7,1%;
TMD elderi – 1,5%;
Azııa elderi – 1,1%;
Okeanııa – 3,4%.
Stıpendıattar qandaı sala nemese baǵyttar boıynsha bilim alyp jatyr:
Gýmanıtarlyq – 43,35%;
Tehnıkalyq – 42%;
Medıtsınalyq – 9,83%;
Shyǵarmashylyq – 4,82%.
