Sońǵy úsh aıda 210 myńnan astam adam JRVI juqtyrǵan
Búgin QR Densaýlyq saqtaý mınıstrliginde ınfektsııalyq aýrýlardyń aldyn alý máselesi talqylandy. Densaýlyq saqtaý mınıstri Eljan Birtanov qyzylsha juqtyrýdyń tsıkldyq joǵarylaýy baıqalǵanyn, syrqattanǵandardyń 67 paıyzy - egilmegen balalar ekenin atap ótti.
«Qazirgi tańda balalardy josparly ımmýndaý jáne egý úshin qyzylshaǵa qarsy vaktsınanyń jetkilikti kólemi qamtamasyz etilgen. Sonymen birge, qajet bolǵan jaǵdaıda vaktsınanyń qosymsha kólemi alynady. JRVI jáne tumaý boıynsha epıdemıologııalyq jaǵdaı turaqty. Barlyq profılaktıkalyq sharalar josparly túrde júrgiziledi», - dep habarlady mınıstr.
Al elimizdiń bas memlekettik sanıtar dárigeri Jandarbek Bekshın qatysýshylardy qyzylsha, JRVI jáne tumaýǵa shaldyǵý boıynsha epıdemıologııalyq jaǵdaımen jáne qoldanylyp otyrǵan sharalarmen tanystyrdy. Onyń aıtýynsha, epıdemıologııalyq kórsetilim boıynsha epıdoshaqtarda 30 jasqa deıingi 2608 adam egilgen.
«Respýblıkada JRVI men tumaý boıynsha epıdemıologııalyq jaǵdaı turaqty. 2018 jyldyń 1 jeltoqsanynan bastap Qoǵamdyq densaýlyqty saqtaý komıteti óńirler boıynsha kún saıyn monıtorıng júrgizedi. Epıdemıologııalyq maýsym bastalǵannan beri 210 myńnan astam JRVI jaǵdaıy tirkeldi. Ótken jyldyń osy kezeńimen salystyrǵanda JRVI men tumaýǵa shaldyǵý 16 paıyzǵa tómendedi. JRVI-men aýyrǵandardyń negizgi úlesin 14 jasqa deıingi balalar qurap otyr (65 paıyz)» - dedi ol.
Keńes qorytyndysy boıynsha Densaýlyq saqtaý basqarmalaryna, aýmaqtyq densaýlyq saqtaý organdary men uıymdaryna ınfektsııalyq aýrýlardyń aldyn alý jóninde usynystar berildi. Atap aıtqanda, qyzylsha boıynsha epıdemııaǵa qarsy is-sharalardy ýaqtyly júrgizý (ınfektsııa oshaǵynyń shekarasyn belgileý, baılanys sheńberin keńeıtý, epıdkórsetimder boıynsha ımmýndaý), vırýsologııalyq zerthanalardyń tumaý shtammdaryn belgileı otyryp, naýqastardan zerthanalyq zertteý júrgizýge daıyndyǵyn qamtamasyz etý, ıntensıvti terapııa kórsetýge arnalǵan tumaýǵa qarsy negizgi preparattardyń, dezınfektsııalyq preparattar men jeke qorǵanysh quraldarynyń rezervin qurý, tumaýdyń klınıkasy, dıagnostıkasy, emdeý jáne aldyn alý máseleleri boıynsha medıtsınalyq uıymdardyń jáne bilim berý uıymdarynyń qyzmetkerlerimen semınarlar ótkizý sharalary tapsyryldy.