Sońǵy bir aıda eldegi koronavırýs juqtyrýdyń ortasha táýliktik kórsetkishi 34 ese azaıǵan

NUR-SULTAN. QazAqparat – QR Densaýlyq saqtaý mınıstri Ajar Ǵınııat Úkimet otyrysynda Sońǵy bir aıda eldegi koronavırýs juqtyrýdyń ortasha táýliktik kórsetkishi 34 ese azaıǵanyn baıandady, dep habarlaıdy QazAqparat tilshisi.

«Qazaqstanda koronavırýs ınfektsııasy boıynsha epıdemıologııalyq jaǵdaı turaqtanyp keledi. Sońǵy aptada aýrýdyń táýliktik ósimi táýligine 1 200 jaǵdaıǵa deıin tómendedi. Bul ınfektsııanyń taralý koeffıtsıentine de áser etti. Ol 27 qańtardan bastap bir birlikten tómen jáne 0,6-ǵa teń.

Epıdemıologııalyq jaǵdaıdy baǵalaý matrıtsasyna sáıkes qazirgi tańda respýblıka «jasyl» aımaqta, 2 óńir «qyzyl» aımaqta jáne 2 óńir «sary» aımaqta, qalǵan óńirler «jasyl» aımaqta ornalasqan», - dedi Ajar Ǵınııat.

Mınıstrdiń aıtýyna qaraǵanda, sońǵy aıda koronavırýs ınfektsııasy jaǵdaılarynyń ortasha táýliktik sany 34 ese azaıǵan.

«Statsıonarda emdelip jatqan adamdardyń sany 2,3 ese, ambýlatorııada emdelýshilerdiń sany 5,1 ese azaıdy.

Búgingi kúni densaýlyq saqtaý uıymdarynda 30 myńnan astam patsıent, onyń ishinde 86%-y (26 648 patsıent) ambýlatorııalyq deńgeıde jáne 14%-y (4 198) statsıonarlyq deńgeıde emin jalǵastyrýda», -dedi mınıstr.