Sońǵy eki jylda elde qansha basseın tekserildi
ASTANA. KAZINFORM — Sońǵy eki jylda elimizde basseınderden alynǵan 50 shaqty sý synamasy sanıtarlyq talapqa saı bolmaı shyqty. Mundaı derekti Sanıtarııalyq-epıdemıologııalyq baqylaý komıteti jarııalady.
— 2024–2025 jyldary 17 nysan tekserilip, Qazaqstan Respýblıkasynyń Kásipkerlik kodeksi aıasynda 89 usynym berilgen. 710 sý synamasynyń gıgıenalyq normatıvterge sáıkestigi zerttelip, onyń 47-si belgilengen talapqa saı emestigi anyqtaldy. Tekserý nátıjesinde úsh ákimshilikke jaza qoldanylyp, bir is sotqa joldanǵan, — delingen vedomstvo málimetinshe.
Atyraýda bolǵan sońǵy tótenshe jaǵdaıdan keıin basseınderdiń qaýipsizdigi taqyryby kún tártibinde tur. Onda qaladaǵy akvaparkterdiń birinde 14 adam hlordan ýlanǵan, sondaı-aq úsh adam aýrýhanaǵa jatqyzylǵan.
Oblystyq sanıtarııalyq-epıdemıologııalyq baqylaý departamenti basshysynyń orynbasary Aıgúl Ysqaqovanyń aıtýynsha, osy oqıǵadan keıin Atyraýdaǵy 20 basseınnen 164 sý synamasy alynǵan.
— Osy oqıǵadan keıin Atyraý qalasynyń bas memlekettik dárigeriniń basseınderdi monıtorıngten ótkizý týraly qaýlysy qabyldandy. 164 sý synamasynyń 76-sy sanıtarııalyq-hımııalyq kórsetkishter boıynsha, 19-y mıkrobıologııalyq kórsetkishter boıynsha talapqa saı emestigi anyqtaldy, — dedi Aıgúl Ysqaqova.
Eldegi basseınderdi josparly tekserý jarty jylda, bir jylda nemese eki jylda bir ret júrgiziledi. Jospardan tys tekserýler shaǵym túskende nemese aýrýdyń órshýi kezinde ótkiziledi.
Eger basseınde sanıtarlyq qorytyndy bolmasa, bul — zań buzý bolyp sanalady. Alaıda ınspektorlar tek zańdy negiz bolǵan jaǵdaıda, ıaǵnı resmı shaǵym tirkelgen jaǵdaıda ǵana basseınderdi teksere alady.
— Aıyppuldar jeke tulǵalarǵa da, zańdy tulǵalarǵa da salynady. Aıyppuldyń mólsheri bıznestiń kólemine — shaǵyn, orta nemese iri ekenine qaraı saralanady. Aıyppul 700 myńnan eki mıllıon teńgege deıin jetýi múmkin, — dedi DSM Ulttyq qoǵamdyq densaýlyq saqtaý ortalyǵy dırektorynyń mindetin atqarýshy Manar Smaǵul.
Densaýlyq saqtaý mınıstrliginiń málimetinshe, balalar basseıninde sýdaǵy hlor deńgeıi lıtrine 0,3 mıllıgramnan, eresekter úshin — 0,6 mıllıgramnan aspaýy kerek. Sondaı-aq, «baılanysqan hlor» dep atalatyn kórsetkish ólshenedi — ol organıkalyq lastaýshylarmen reaktsııa nátıjesinde paıda bolady. Onyń shekti mólsheri — 1,2 mg.
Sonymen qatar, Manar Smaǵuldyń aıtýynsha, sýdyń tazalyǵy kelýshilerdiń de tártibine baılanysty. Sýǵa túser aldynda adamdardyń dýsh qabyldaýy, krem men kosmetıka qoldanbaýy, bas kıim men ekinshi aıaq kıim kııýi sekildi erejelerdi saqtaý — mańyzdy nárse.
Al eger sý sapasyna kúmán týsa, e-otinish arqyly shaǵym berýge bolady, sodan keıin nysanǵa jospardan tys tekserý júrgiziledi.