Soltústik Koreıa 200 snarıad ushyryp, Ońtústik Koreıaǵa shabýyl jasady

QHDR Ońtústik Koreıaǵa 200 snarıad ushyrdy. Ońtústik Koreıa bıligi evakýatsııa jarııalady. Kazinform bul týraly VVS-ge silteme jasap habarlaıdy.

Soltústik Koreıa Ońtústik Koreıamen shekaraǵa jaqyn mańǵa 200-den astam artıllerııalyq snarıad ushyrdy, ońtústikkoreıalyq eki aral turǵyndaryna evakýatsııalalaný týraly buıryq berildi, dep habarlady Seýl.

Ońtústik Koreıa mundaı áreket beıbitshilikke qaýip tóndiretinin eskertip, jaýap qaıtarýymyz múmkin dep qorqytty.

«Búgin 9.00-den 11.00-ge deıin Soltústik Koreıa áskeri Pennendo aralynyń soltústik bóligindegi Chansan-got aýdany men Enphendo aralynyń soltústik bóligindegi aýdandarǵa 200-den astam oq jaýdyrdy», — dep málim etti brıfıngte Ońtústik Koreıa Qorǵanys mınıstrliginiń ókili.

BAQ habarlaýynsha, snarıadtar eki el arasyndaǵy shekara sanalatyn Soltústik shektesý syzyǵy aýdanyndaǵy Sary teńizge túsken.

«Bul — Koreıa túbegindegi beıbitshilikke qaýip tóndiretin arandatý amaly. Soltústik Koreıa shıeleniske tolyqtaı jaýapty, biz bul áreketterdi dereý toqtatýǵa shaqyramyz», — dep tolyqtyrdy Koreıa Qorǵanys mınıstrligi.

2010 jylǵy qarashada Phenıan Enphendo aralyna 170 artıllerııalyq snarıad ushyryp, tórt adam, onyń ishinde eki beıbit turǵyn qaza tapqan bolatyn.

Bul — Koreı soǵysynan bergi ýaqytta QHDR-diń beıbit aýdandarǵa jasaǵan alǵashqy shabýyly boldy.