Soltústik Qazaqstanda 2400 úıdi sý basqan

ASTANA. KAZINFORM – Soltústik Qazaqstan oblysy tótenshe jaǵdaılar departamentiniń baspasóz hatshysy Evgenıı Jýravlev Soltústik Qazaqstan oblysyndaǵy jaǵdaı áli kúrdeli ekenin aıtty.

«Oblysymyzdaǵy jaǵdaı áli de kúrdeli. Sergeev sý qoımasy 149 % tolyp, sý bóget shyńynan 2 metr 61 santımetr asty. Táýlik ishinde 9 santımetr tómendedi. Esil ózeninde sý deńgeıi kóterilip keledi. Ózen jaǵasynyń mańynda ornalasqan Qyzyljar aýdanynyń eldi mekenderi men Petropavl qalasynda úılerdi sý basý derekteri tirkelgen. Qazirgi sátte oblysta 2401 úı jáne 1115 úı mańyndaǵy aýmaqtardy sý basqan», - dedi departament ókili.

Jalpy oblys aýmaǵynda 12 235 adam qaýipsiz jerge kóshirilgen. Onyń 2 919-y - bala. Táýlik ishinde 2 947 adam, onyń ishinde 488 bala evakýatsııalanǵan.

Ázirge tek 44 adam úıine qaıtyp barǵan. Evgenıı Jýravlevtiń aıtýynsha, óńirde 3 590 bas mal qaýipsiz jerlerge kóshirilgen.

«Tasqynnyń negizgi tolqyny Qyzyljar aýdanynyń Teplıchnoe, Prıbrejnoe kentterine keldi. Bul eldi mekenderde 565 úıdi sý basyp, 2 287 adam evakýatsııalandy. Sońǵy táýlik ishinde sý Bolshaıa malyshka, Sokolovka, Vıshnevka, Olshanka eldi mekenderine kirip, 317 úıdi sý basty, 1562 adam evakýatsııalandy. Sý deńgeıi ásirese Petropavl qalasynda kóterilip tur. Alaıda jýyr mańda birtindep túsedi dep otyrmyz», - dedi ol.