Jeńildetilgen nesıeleý kólemi rekordtyq 580 mlrd teńgege jetti – AShM
PETROPAVL. KAZINFORM – Aýyl sharýashylyǵy mınıstri Aıdarbek Saparov Soltústik Qazaqstan oblysyna jumys sapary barysynda agroónerkásiptik keshendi damytý máseleleri boıynsha keńes ótkizdi. Aǵymdaǵy egin jınaý naýqanynyń nátıjeleri talqylanyp, kelesi aýyl sharýashylyǵy jylyna josparlar belgilendi. Bul týraly AShM baspasóz qyzmeti málim etti.
Keńeske qatysýshylarǵa aýyl sharýashylyǵy taýaryn óndirýshilerdi qoldaý boıynsha qabyldanyp jatqan jáne josparlanyp otyrǵan sharalar, bıdaıdy satyp alý baǵasy, kóktemgi egis jáne egin jınaý jumystaryn kredıtteý jáne salany qoldaýdyń basqa da jańa tásilderi týraly aqparat berildi.
Mınıstr aǵymdaǵy jyly jeńildetilgen nesıeleý kólemi rekordtyq 580 mlrd teńgege jetkenin, aýyl sharýashylyǵy tehnıkasynyń lızıngine 120 mlrd teńge bólingenin eske saldy. Kelesi jyly osyndaı tetik qaıta óńdeý kásiporyndaryn qarjylandyrýda qoldanylady.
Jalpy, Prezıdent belgilegen mindetterdi iske asyrý úshin kóktemgi egis jáne egin jınaý jumystaryn qarjylandyrý kólemin 900 mlrd teńgege, onyń ishinde aýyl sharýashylyǵy tehnıkasynyń lızıngin 200 mlrd teńgege deıin jetkizý josparlanyp otyr.
Sondaı-aq, SQO tájirıbesi boıynsha baǵdarlama sheńberinde jeńildetilgen nesıeleý kólemin jáne qarjylandyrylatyn baǵyttar sanyn ulǵaıtý josparlanǵan.
«Agrarshylar memleket tarapynan buryn-sońdy bolmaǵan qoldaýǵa ıe bolǵanyn eskere otyryp, biz kútken nátıjege qol jetkizip jatyr. Qazir bizdiń aldymyzda negizgi mindet tur — egin jınaý jumystaryn aıaqtaý jáne egindi saqtaý, ásirese kesheýildep qalǵan óńirlerde. Barlyq resýrstardy jumyldyrý qajet. Osy aýylsharýashylyq maýsymyn sátti aıaqtap, kelesi jyly qarqynymyzdy báseńdetpeýimiz kerek», — dedi A. Saparov.
Soltústik Qazaqstan oblysynda egis alqaby - 4,3 mln ga, qazir 3 mln ga (90,5%) jınaldy, 17,8 ts/ga ónimdilikte 5,6 mln tonna bastyryldy, 3 mln tonnaǵa jýyq jem daıyndaldy. Sapar barysynda mınıstr «Betege-Ý» elevatorynyń jumysymen tanysty, bıdaı qabyldaý úzdiksiz júrgizilip jatyr, kezek joq.
Aıta ketsek, qazirgi ýaqytta dándi daqyldardyń 93,2%-y nemese 15,5 mln gektardan ónim jınaý aıaqtalǵan.
