«Soltústikke barǵan balany ne kútip tur?» - baspasózge sholý
«20 994 júrgizýshiniń kýáligi zańsyz alynǵan», dep habarlaıdy «Egemen Qazaqstan» gazeti kezekti maqalasynda.
Qyzylorda oblysynda 20 994 azamattyń júrgizýshi kýálikteri zańsyz alynǵany anyqtalyp otyr. «Oblystyq prokýratýra ishki ister departamentinde jol-kólik oqıǵalarynyń aldyn alý jumystary tıimdiligin tekserý barysynda 20 994 azamattyń júrgizýshi kýálikteri zańsyz alynǵanyn anyqtady. Bulardyń bári kólik quralyn júrgizý quqyǵynan aıyrý túrindegi jazany taǵaıyndaýǵa jatpaıtyn ákimshilik quqyq buzýshylyqtar bolyp shyqty», delingen maqalada.
Sondaı-aq, prokýrordyń narazylyǵy boıynsha ákimshilik jaýaptylyqtan bosatylǵan 41 azamattyń áli kúnge deıin «Ákimshilik quqyq buzýshylyqtar jáne olardy jasaǵan tulǵalar týraly ortalyqtandyrylǵan derekter bankinde» negizsiz jaýaptylyqqa tartylǵan tulǵa retinde esepte turǵany anyqtaldy.
«Aıqyn» basylymynda ońtústik óńirlerdegi jastardyń soltústikte bilim alýyna jeńildik jasaıtyn jańa bastama týraly maqala jarııalady.
«Elimizde maýsym aıynan bastap, «Máńgilik el jastary - ındýstrııaǵa» atty memlekettik baǵdarlama júzege asyryla bastaǵan. Bul ońtústik oblystardyń jastaryn elimizdiń soltústik, batys jáne shyǵys aımaqtarynda bilim alýyna múmkindik beretin baǵdarlama», - delingen «Soltústikke barǵan balany ne kútip tur?» atty materıalda.
«Órleý» AQ dırektorlar keńesiniń tóraǵasy Murat Ábenov bul joba boıynsha, mektep bitirgen túlekterdiń soltústik óńirlerde bilim alýyna múmkindik beriledi degen edi. «Mańǵystaý, Qyzylorda, Ońtústik Qazaqstan, Jambyl óńirlerinde demografııalyq kórsetkish joǵary, alaıda jumys oryndary tapshy. Pavlodar, Shyǵys Qazaqstan sııaqty aımaqtarda kerisinshe, zaýyt, fabrıkalar kóptep salynyp jatqanymen, jumys kúshi jetispeıdi. Baǵdarlama osy olqylyqtyń ornyn toltyrady» degen edi Murat Ábenov», - deıdi gazet.
«Qaraǵandydan tabylǵan qundy qazyna» atty kezekti maqalasynda «Aıqyn» basylymy Qaraǵandy oblystyq tarıhı-ólketaný mýzeıi Buqar jyraý aýdany, Úmitker aýyldyq okrýgi, Úlgi aýylyna qarasty Qaraqoıtas qorymynda júrgizilgen arheologııalyq ǵylymı-zertteý jumystary jaıynda sóz qozǵaıdy.
Qazba barysynda qola, ıaǵnı erte temir dáýirine, túrik kezeńine jatatyn 3 qorǵan zertteldi. «Nátıjesinde altyn syrǵanyń salpynshaǵy, qysh ydystardyń synyqtary, at-ábzelderi, áshekeılenip jasalǵan súıekter, tas boıtumar syndy tarıhı qundy jádigerler tabyldy.
Sonymen birge, at júgeniniń kúmispen qaptalǵan úsh túrli qola japsyrmalary tabylady. Biri - qasqyrdyń basy pishindes bolsa, ekinshisi - qanjardyń ushy tárizdi súıirlenip jasalǵan, úshinshisi sheńber pishindes bolyp kelgen. Adamnyń moıyn omyrtqasy mańynan tastan jasalǵan kók boı tumar tabyldy», - delingen maqalada.
Polıtsııa qyzmetkeri Janserik Dáýrenbekovtiń qatysýymen bolǵan aty-shýly jol-kólik oqıǵasynan keıin Qaraǵandy oblysynyń ІІD qataryn tazartý aýqymdy sharasy bastalyp ketti, dep jazady resmı tilde jarııalanatyn «Ekspress K» gazeti.
«Eske sala keteıik, 24 tamyzda Topar - Jartas tasjolynda 30 jastaǵy Qaraǵandy Іshki ister basqarmasy Ońtústik-shyǵys bólimshesi bastyǵynyń orynbasary Janserik Dáýrenbekov qyz balany qaǵyp ketip, oqıǵa ornynan izin sýytqan bolatyn. Ókinishke oraı, dárigerler onyń ómirine arasha túse almady. Anyqtalǵanyndaı, polıtsııa qyzmetkeri ony óziniń qyzmettik kóligimen qaǵyp ketken, onyń ústine birshama qyzyp alǵan kórinedi. Sot sheshimi boıynsha Janserik Dáýrenbekov eki aıǵa qamaýǵa alyndy jáne jumysynan bosatyldy. Sonymen qatar Qaraǵandy Іshki ister basqarmasy Ońtústik-shyǵys bólimshesiniń bastyǵy men onyń kadrlyq ister jónindegi orynbasary qyzmetterinen qýyldy», - delinedi maqalada. Tolyǵyraq «DVD Karagandınskoı oblastı obezglavılı» atty maqaladan oqı alasyzdar.
