Soltústikqazaqstandyqtar Abaı mereıtoıyn onlaın atap ótýde
Búgin óńir basshysy Qumar Aqsaqalov, zııaly qaýym ókilderi Petropavldaǵy Qazaqstan Konstıtýtsııasy kóshesiniń boıynda ornalasqan Abaı-Pýshkın eskertkishine gúl shoqtaryn qoıdy. Jastar aqynnyń óleńderin oqydy.
Qoladan quıylǵan, granıt tas tuǵyrǵa ornatylǵan alyp eskertkish 2006 jyly ornatylǵan edi. Osy jyl Reseıde Abaı jyly, al Qazaqstanda Pýshkın jyly bolyp jarııalanǵan edi. Abaıǵa eskertkish Máskeýde qoıylsa, qatar turǵan Abaı-Pýshkın músinderi Soltústik Qazaqstan oblysynyń Petropavl qalasynda boı kóterdi.
«Abaıdyń týǵan kúni ulttyq mereke retinde jarııalanýy, bul – qazaqtyń aqyl-oıyna, poezııasyna, qazaqtyń jerine kórsetilgen úlken qurmet. Úkimettiń mynaý sheshimin qabyl alyp, qoldap, búkil jerlesterimdi, shákirtterimdi, aǵaıyn-týystarymdy Abaı kúnimen quttyqtaımyn. Abaıdyń aıtyp ketken árbir sózi, naqyl sózderi bizdiń rýhanı ósýimizge, bala tárbıesine kómektesedi. Abaı sııaqty tulǵanyń qundy sózi bizge olja», - deıdi aqynnyń eskertkishine gúl shoǵyn qoıýǵa kelgen belgili ǵalym, abaıtanýshy Zarqyn Taıshybaı.
Petropavlda búgin Abaıdyń mereıtoıyna oraı birqatar is-shara onlaın formatta ótkizilip jatyr. Oblystyq qazaq-orys teatrlary áleýmettik jeli arqyly tikeleı efırde mýzykalyq-poetıkalyq qoıylym qoıyp, M. Áýezovtiń «Abaı joly» romanynan taraýlar oqýda. «Álemniń Abaıy» atty oblystyq múshaıra onlaın túrde ótti. Kitaphanalar óz oqyrmandaryna qashyqtan túrli dárister, kezdesýler uıymdastyrsa, óner ujymdary Abaı Qunanbaıulynyń mereıtoıyna arnalǵan «Keń dalanyń kemeńgeri» atty merekelik kontsertti tikeleı efırde usynbaq.
