Soltústik Koreıa amerıkalyq sarbazdyń elge qashyp kirgenin rastady
23 jastaǵy qatardaǵy jaýynger 18 shildede demılıtarızatsııalanǵan aımaqqa ekskýrsııaǵa baryp, sol jerde Soltústik Koreıa shekarasyn óz erkimen kesip ótken edi.
Soltústik Koreıanyń jaýaby Phenıannyń kelissózdi bastaýǵa daıyn ekenin bildirýi múmkin.
Demılıtarızatsııalanǵan aımaqty baqylaıtyn BUU qolbasshylyǵy birlesken qaýipsizdik aımaǵynda Soltústik Koreıa armııasymen tikeleı baılanysqa shyǵyp, qatardaǵy jaýynger Kıng týraly aqparat suratty.
«Soltústik Koreıa áskeri qatardaǵy Kıng jaıly suraǵymyzǵa jaýap berdi. Ony úıge qaıtarý jónindegi kelissózge kedergi bolmas úshin jaýaptyń egjeı-tegjeıin aıta almaımyz», - delingen málimdemede.
Phenıan buǵan deıin suraýdy alǵanyn rastaǵan, biraq tolyqqandy jaýap endi ǵana keldi.
Shekaradan ótkenge deıin Kıng shabýyl jasady degen aıyppen Ońtústik Koreıada eki aı túrmede otyrdy.
10 shildede túrmeden shyqqan ol birden AQSh-qa ushyp ketýi kerek edi, biraq áýejaıdan sytylyp shyǵyp ketip, shekaraǵa ekskýrsııaǵa bardy.
Trevıs Kıng - barlaý mamany, 2021 jyldyń qańtarynan beri áskerde qyzmet etip júr.
Ońtústik Koreıada rotatsııa aıasynda jumys istedi.
Demılıtarızatsııalanǵan aımaq Soltústik jáne Ońtústik Koreıany ekige bólip, týra ortasynda jatyr.
Sońǵy jyldary birneshe Amerıka azamaty Soltústik Koreıaǵa zańsyz kirdi.
Olardyń kóbi qylmys jasaǵany úshin sottalǵandardy qospaǵanda alty aı ishinde bosatyldy.
Kıngtiń tutqyndalýy AQSh prezıdenti Djo Baıden úshin syrtqy saıasattaǵy shıelenisti jaǵdaılardyń biri bolyp otyr.
Kıng - qazirgi ýaqytta Soltústik Koreıada qamaýda otyrǵan jalǵyz amerıkalyq.
Sonymen birge elge zańsyz kirgen Ońtústik Koreıanyń alty azamaty da qamaýda otyr.
