Soltústik Qazaqstanda UBT-ǵa telefon kirgizgen 5 túlektiń test nátıjesi joıyldy

PETROPAVL. QazAqparat – Soltústik Qazaqstan oblysynda bes túlek Ulttyq biryńǵaı testileý talabyn buzǵany úshin synaqtan shettetilse, taǵy ekeýi dene qyzýy kóterilgendikten testileýden óte almady, dep habarlaıdy QazAqparat tilshisi.

Búgin SQO bilim basqarmasy basshysy Gúlmıra Kárimova onlaın brıfıng ótkizip, óńirde UBT-nyń barysymen tanystyrdy.

Bıyl oblys boıynsha 2910 adam UBT-ǵa qatysýǵa nıet bildirgen. Onyń 2478-i bıylǵy mektep túlekteri. Ótken jylmen salystyrǵanda testileýge qatysýǵa tilek bildirýshilerdiń sany 15,7% artqan.

Tórt kúnniń qorytyndysy boıynsha 834 adam testileýden ótti. Olardyń UBT tapsyrý sátin onlaın baqylaýǵa múmkindik boldy.

Qazirgi tańda eń joǵary – 128 ball Tımırıazev aýdanyndaǵy Mıchýrıno orta mektebiniń túlegi Daıana Vasılıýkke tıesili. Jalpy 29 mektep bitirýshi 100-den joǵary ball aldy.

«Uıaly telefon qoldanǵandary úshin aýdıtorııadan 5 túlek shyǵarylyp, akt toltyryldy jáne olardyń test nátıjesi joıyldy. Olar Ǵ.Músirepov aýdanynyń – 2, Tımırıazev aýdanynyń – 2 jáne Petropavldaǵy Ábý Dosmuhambetov atyndaǵy mamandandyrylǵan mektep-ınternatynyń bir túlegi. Taǵy eki bala dene qyzýynyń joǵarylaýyna baılanysty testileýge jiberilmedi», - deıdi Gúlmıra Kárimova.