Soltústik Qazaqstanda bıyl 2,4 myńnan astam túlek UBT tapsyrady
SQO óńirlik kommýnıkatsııalar qyzmetinde oblystyń bilim basqarmasynyń jetekshisi Gúlmıra Kárimovanyń qatysýymen brıfıng ótti. Gúlmıra Raıymbekqyzynyń aıtýynsha, tótenshe jaǵdaı rejıminiń aıaqtalǵanyna qaramastan, barlyq mektep pen kolledjderde qashyqtan oqytý jalǵasady. 9 jáne 11-synyp oqýshylary úshin bitirý emtıhandary bolmaıdy. Attestattar jyldyq qorytyndy negizinde beriledi.
«5-11 synyp aralyǵynda úzdik oqyǵan túlek «Altyn belgini» alady. Al 10-11-synyptarda úzdik oqyǵan oqýshylarǵa «Úzdik attestat» beriledi. Oblysta «Altyn belgige» 151 bala jáne «Úzdik attestatqa» 116 bala úmitker. 9-synyptyń 263 túlegi «Úzdik attestatqa» ıe bolady», - deıdi SQO bilim basqarmasynyń jetekshisi Gúlmıra Kárimova.
Oqý 25 mamyr aıaqtalǵanymen, oblysta bul kúni «sońǵy qońyraý» merekesi bolmaıdy. «Sońǵy qońyraý» jáne attestattardy tapsyrý biriktirilip, 3-4 maýsymda ótkizilmek.
«Іs-shara mindetti túrde mektep aýmaǵynda jáne ashyq aýada qonaqtarsyz, tek bitirýshilerdiń qatysýymen, sanıtarlyq normalardy saqtaı otyryp ótkiziledi. Oqýshylarǵa mektep formasyn kııýdi usyndyq», - deıdi Gúlmıra Kárimova.
Tehnıkalyq jáne kásibı bilim berý uıymdarynda oqý jylynyń aıaqtalýyna oraı emtıhandar Zoom arqyly «SOVA» bilim berý platformasynyń avtomattandyrylǵan testileý keshenin paıdalana otyryp ótkiziledi. Oblys kolledjderinde 6186 stýdent bolsa, sonyń jartysyna jýyǵy bıyl oqýyn aıaqtaıdy.
Kolledjderde qabyldaý komıssııasy 1 maýsymnan jumysyn bastaıdy.
Jalpy bıyl oblysta 11-synypty 3275 túlek bitirgeli otyr. Onyń 2477-si UBT tapsyrýǵa ótinish berdi. Bul - jalpy túlekter sanynyń 75,2%. UBT 20 maýsymnan 5 shildege deıin ótkiziledi dep josparlanǵan.
